Parlament Májilisiniń jalpy otyrysynda bir top depýtat qandastardyń qujattaryn retke keltirý máselesin kóterdi, dep habarlaidy "Ult aqparat".
«Biyl egemendigimizge 30 jyl tolǵaly otyr. Osy jyldary 1 mln 70 myń 300 etnikalyq qazaq atajurtyna oraldy. Onyń syrtynda búkil dúniejúzilik qaýymdastyǵy quryldy. Prezident Qasym-Jomart Toqaevtyń qoldaýymen shetelden atamekenge qaitqan azamattardyń mártebesi artyp, qany bir baýyrlarymyzdy «qandastar» deitin boldyq. Osy kúni ol qandastarymyz ekonomikanyń ár salasynda jemisti qyzmet etip jatqany da ras», - dedi depýtat Ǵaziz Qulahmetov Úkimet basshysy Asqar Maminniń atyna joldaǵan saýalynda.
Osy oraida ol taǵdyrdyń tálkegimen nebir shytyrman oqiǵalarǵa tap bolyp jatqan qandastarymyzdyń áli de kóp ekenin aitty.
«Jeke qujattarynda ulty jazylmaǵan qandastarymyzdyń aldy 9 jyl, sońy 2 jyl aralyǵynda azamattyq ala almaýynyń naqty sebebin túsindirýge ne kedergi. Olardyń bári balalaryn mektepke berýge, dárigerlerge qaratyp, bala-baqshaǵa tirkelý kezinde kóp qiyndyqtardyń baryn ashynyp aityp otyr. Elge oralǵysy keletin jáne oralǵan azamattar otbasylarynan ajyrap, eki-úsh memleket territoriiasynda ómir súrýge májbúr ekeni de ashy shyndyq. Mundai otbasylar respýblikanyń ár aimaǵynda bar desek, qatelespespiz. Al, olardyń Qazaqstanda dúniege kelip, balalarynyń qujattaryn rásimdemegenin eskeretin bolsaq, tirkeýde joq búldirshinderdiń naqty esebin kim aityp bere alady?», - dedi Ǵaziz Qulahmetov.
«Osy jaǵdaidy eskere otyryp, QR Ishki ister, Syrtqy ister, Eńbek jáne halyqty áleýmettik qorǵaý ministrlikteri birlese otyryp, vedomstvoaralyq komissiiada týý týraly kýáligi joq, resmi tirkeýde joq azamattardyń naqty sanyn anyqtap, saýalda kórsetilgen azamattardyń qujattandyrý máselesin qarastyrýdy jáne resmi tiisti barlyq sharalar qoldanyp, qandastarymyzdyń ózge de problemalaryna tereń boilap, jan-jaqty jaǵdai jasaýyńyzdy suraimyz!», - dedi ol.
