Parlament Májilisine Qazaqstan halqy Assambleiasynan sailanǵan depýtattar qandastarǵa bólinetin kvotanyń kólemin kóbeitýdi surady. Osy oraida Úkimet basshysy Asqar Maminniń atyna depýtattyq saýal joldandy, dep habarlaidy "Ult aqparat"
«Biyl, Táýelsizdiktiń 30 jyldyǵynda Táýelsizdiktiń halqymyzǵa bergen basty igilikteriniń biri – alys jáne jaqyn shetelderden qazaqtardyń Otanǵa oralýyna jol ashylǵanyna da 30 jyl tolmaqshy. Elimiz óz erkindigine qol jetkizerdiń aldynda, 1991 jylǵy 18 qarashada Qazaq KSR Ministrler Kabineti «Basqa respýblikalardan jáne shetelderden selolyq jerlerde jumys isteýge tilek bildirýshi baiyrǵy ult adamdaryn Qazaqstanda qonystandyrýdyń tártibi men sharttary týraly» arnaiy qaýly qabyldaǵan bolatyn. Migratsiialyq saiasattyń 2017-2021 jyldarǵa arnalǵan tujyrymdamasynda «1991 jyldan beri elge kelgen etnikalyq repatrianttardyń sany 1 million adamnan asty» dep kórsetilgen. Alaida, keiingi jyldarda, naqty aitqanda 2012 jyldan bastap elden turǵyndardyń kóship ketýi kúsheiýiniń jaǵymsyz úrdisi bastaldy, ol úrdis qazir kúsheie túsýde», - dedi S. Abdrahmanov Májilistiń jalpy otyrysynda.
Depýtat qazirgi tańda Úkimet qaýlysyna sáikes qandastarymyz ornalastyrylatyn óńirler retinde Aqmola, Atyraý, Shyǵys Qazaqstan, Batys Qazaqstan, Qostanai, Pavlodar, Soltústik Qazaqstan oblystary bekitilgenin eske saldy. Osy jeti oblysqa etnikalyq qazaqtardyń kóship kelýine bólingen kvota 2020 jyly 1378 adam boldy. 2021 jylǵa bólingen kvota sany 1426. Ósim joqqa jýyq. Ekonomikalyq ahýal anaǵurlym kúrdeli bolǵan kezdiń ózinde bul kvota jylyna 10 myń men 20 myńnyń arasynda edi, sonyń arqasynda jylyna memlekettiń kómegimen 40 myńnan 80 myńǵa deiin adam shetelderden kóship keletin.
«Jumys kúshi artyq óńirlerden adamdardy jumys kúshin qatty qajetsinip turǵan óńirlerge qonystandyrý jumysy da jóndi júrmei jatyr. Turǵyn úi bólý, jeńildetilgen kreditter berý, jaiylymǵa, egindikke jer ýchaskelerin taratý, kósheraqy qarajatyn qarastyrý tiisinshe oilastyrylmaǵan. Jańa óńirge kóship barýdyń ońdy tájiribesi durys nasihattalmaidy. Mundai úlken iste bolmai qoimaityn kemshilikterdi alaýlatyp-jalaýlatyp kórsetý, sóitip qaita kóship ketýge beiim kóńil-kúidi kúsheitý, basqa jerge baryp, baǵyn synaýshylardyń saǵyn salǵan betten syndyrý basym. Týǵan jer uǵymynyń keńdigin, «týǵan jer» men «Otan» uǵymdary ortaq ekendigin júrekterge jetkizý jaǵy kemshin», - dedi Abdrahmanov.
Osy oraida depýtattyq saýalǵa bailanysty Úkimettiń eldegi migratsiialyq jáne demografiialyq protsesterdi turaqtandyrý maqsatymen qandastarǵa bólinetin kvotanyń kólemin kóbeitý, beiimdeý men kiriktirý ortalyqtaryn qurý, repatrianttarǵa memlekettik qyzmetti qazaq tilinde kórsetý, jumys kúshi artyq óńirlerden adamdardy soltústiktegi óńirlerge qonystandyrý siiaqty máselelerdiń sheshilý joldaryn qarastyrýdy surady.
