Parlament Májilisiniń jalpy otyrysynda tótenshe jaǵdai kezinde fermerlerge kómektesý máselesi kóterildi. Osy oraida Úkimet basshysy Asqar Maminniń atyna tiisti depýtattyq saýal joldandy, dep habarlaidy QazAqparat.
«Aýyl turǵyndaryn tolǵandyratyn asa ózekti máselelerdiń biri – kóktemgi dala jumystaryn qarjylandyrý. AÓK sýbektilerin nesielendirý «QazAgro» UBH-nyń «Agrarlyq nesie korporatsiiasy» AQ jáne «Aýyl sharýashylyǵyn qarjylai qoldaý qory» AQ arqyly, sondai-aq ekinshi deńgeidegi bankterdi jáne kredittik seriktestikterdi qorlandyrý arqyly júrgiziledi. Shamamen, 170 mlrd teńge bólingenine qaramastan, bul qarajat tolyq kólemde igerilmeýde jáne sońǵy qaryz alýshylarǵa, birinshi kezekte Aýyl sharýashylyǵy taýar óndirýshilerdiń (AShTÓ) kepildikteriniń bolmaýy nemese azdyǵy sebebinen jetpei jatyr», - dep toqtaldy depýtat Berik Ospanov.
Onyń sózinshe, qarjylandyrý problemasyn sheshý joldarynyń biri – ónimdi forvardtyq satyp alýdy qoldaný bolýy múmkin. Osy oraida depýtat bul baǵytta Memleket basshysy bergen tapsyrmany eske saldy.
«Ókinishke qarai, atalǵan qoldaý tetigi keshiktirilýde, al AShTÓ qarjylandyrý qiyndyqtaryn bastan keshirýde. Ótken jyldarda, astyqty forvardtyq satyp alýdy qoldaný kezinde «Azyq–túlik kelisimshart korporatsiiasy» Ulttyq kompaniiasy» AQ AShTÓ-ge kepilger retinde óńirlik Áleýmettik–kásipkerlik korporatsiialardyń múmkindikterin paidalandy. Mundai shemada ákimdikter jergilikti taýar óndirýshilermen barlyq uiymdastyrý máselelerin naqty jáne ýaqtyly pysyqtap otyrdy, qarajatty qaitarý kezinde problemalar bolǵan joq. Osyǵan bailanysty forvardty satyp alýdy júrgizý úshin óńirlik ÁKK múmkindikterin paidalanýdy qarastyrýdy usynamyz. Birinshiden, ÁKK ákimdikterdiń qarjy institýty retinde qaryz alýshy týraly tolyq aqparattary bar. Ekinshiden, satyp alynatyn ónim eń aldymen jergilikti halyqtyń qajettiligi úshin kerek. Bul tetik turaqtandyrý qorlaryn tolyqtyrýǵa jáne ónimderdi deldalsyz satý máselelerin retteýge múmkindik beredi. Sondai-aq jarma, dándi, maily daqyldar, kartop jáne kókónis siiaqty birneshe baǵyttar boiynsha ónimder satyp alýdy usynamyz», - dedi Ospanov.
Onyń paiymynsha, ÁKK-ni «QazAgro» AQ arqyly nemese respýblikalyq biýdjetten bólingen biýdjettik kreditterdiń bir bóligin jergilikti biýdjetke qaita bólý jolymen de qarjylandyrýǵa bolady.
«Qurmetti Asqar Uzaqbaiuly, qorytyndylai kele, Sizden kóktemgi jala jumystary kezinde fermerler men AShTÓ-niń «jasyl dáliz» arqyly kedergisiz ótý máselesine taǵyda nazar aýdarýyńyzdy suraimyz! Qazirgi ýaqytta ár kún jáne ár saǵat óte mańyzdy, óitkeni jer jumystary kúttirmeidi! Búgingi tańda óńirlerdegi shtabtar bul máseleni óz qalaýy boiynsha rettep otyr, biryńǵai algoritm jáne naqty erejeler bekitilmegen», - dedi B. Ospanov.
