Májilistiń jalpy otyrysynda depýtat Erlan Smailov jańa saiasi institýt – eńbek quqyqtary jónindegi ýákil institýtyn qurýdy usyndy, dep habarlaidy "Ult aqparat".
«Jaldamaly jumysshylar, eńbek adamdary – halyqtyń eń kóp bóligin quraityn top. Sóite tura, olar halyqtyń eń osal toby bolyp sanalady. Ortalyq jáne jergilikti bilik organdary eńbek quqyqtaryn qorǵaý máselelerimen belsendi túrde ainalysady. Biraq olardyń kúsh-jigeri jumyspen qamtý baǵdarlamalarynyń statistikasyn arttyrýǵa, eńbek janjaldarynyń statistikasyn tómendetýge jáne áleýmettik shielenistiń deńgeiin kóterýge jol bermeýge baǵyttalǵan. Saiasat daǵdarysqa qarsy den qoiýdyń taza sitýatsiialyq rejiminde qurylǵan», - dedi depýtat Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń paiymynsha, eńbek salasynyń iri problemalaryn sheshý boiynsha júieli jumys júrgizilmeidi. Ortasha jáne mediandyq jalaqyny arttyrý, JIÓ-degi eńbekaqy úlesin kóbeitý, sapaly, ónimdiligi joǵary jumys oryndarynyń úlesin ulǵaitý, eńbek naryǵynyń qurylymyn jaqsartý boiynsha naqty maqsattar men tásilder joq.
«Eńbek janjaldary, eń aldymen, áleýmettik jáne ekonomikalyq turaqtylyq úshin qaýip retinde qarastyrylady. Bul, árine, durys. Biraq jaǵdaiǵa jumysshylardyń kózqarasy boiynsha da qaraý mańyzdy. Olar úshin negizgi qaýip – jumys bola tura óz otbasyn laiyqty asyrai almaý, balalaryn oqytýǵa aqsha jinai almaý, óz biliktiligine barabar usynys taba almaý. Al memlekettiń mindeti – osyndai táýekelmen kúresý», - dedi Erlan Smailov.
Onyń aitýynsha, jaldamaly jumysshylardy quqyqtyq qorǵaýdyń ózi endi jetkiliksiz. Óitkeni jumys berýshiler eńbek jaǵdailaryn nasharlatýdyń quqyqtyq negizderin tabýdy úirendi. Bizge ádil eńbek jaǵdailary saiasaty qajet.
Osyǵan bailanysty «Qazaqstan Halyq partiiasy» fraktsiiasynyń depýtattary kelesidei usynystardy jasady:
Birinshiden, kvazimemlekettik sektorda qaryz eńbeginiń nysandaryn qoldanýdy shekteý. Barlyq eńbek deldaldarynyń qyzmetterine júginýdiń ekonomikalyq oryndylyǵyn tekserý kerek.
Ekinshiden, eńbek qunyn tómendetýdi yntalandyrý jáne jumyspen qamtýdyń shtattan tys nysandaryna kóshý saiasatynan qyzmetkerlerge áleýmettik kepildikter bere otyryp, tolyqqandy eńbek qatynastaryn kótermeleý saiasatyna kóshý.
Úshinshiden, eńbek máseleleriniń ósip kele jatqan ózektiligin eskere otyryp, jańa saiasi institýt – eńbek quqyqtary jónindegi ýákildi qurý, ol qazaqstandyqtardyń buzylǵan eńbek quqyqtary men eńbek ádildigin qorǵaýǵa shoǵyrlandyrylýǵa tiis.
