Parlament depýtattary halyq únine qulaq asýdy jón kórip, Nur-Sultan qalasyna burynǵy ataýyn qaitarýdy usyndy. Bul týraly Májilis spikeri Erlan Qoshanov málimdedi, dep habarlaidy Sputnik Qazaqstan.
Májilis kýlýarynda jýrnalister depýtattar elordaǵa nege Astana ataýyn qaitarýdy usynǵanyn surady.
"Birneshe jyl buryn elordanyń ataýyn ózgertkennen bastap qoǵamnyń ishinde pikirtalas tolastamady. Áli kúnge deiin júrip jatyr. Halyq arasynda alýan túrli pikir bar. Sonyń kóbisi burynǵy ataýyn qaitarýǵa qatysty. Sondyqtan depýtattar "halyq únine qulaq asatyn memleket" retinde halyqtyń únine qulaq asý qajet degen usynyspen osy máseleni kóterdi. Endi alda qandai sheshim bolatynyn kúteiik", - dep jaýap berdi Qoshanov.
2 qyrkúiekte májilistegi "Jańa Qazaqstan" depýtattyq tobynyń músheleri elordaǵa Astana ataýyn qaitarý týraly bastama kóterdi.
Eske salsaq, 2019 jyly 23 naýryzda Astana ataýy resmi túrde Nur-Sultan dep ózgertildi. Nursultan Nazarbaev otstavkaǵa ketkennen keiin, el tizginin qolǵa alǵan qazirgi Prezident Qasym-Jomart Toqaev Elbasynyń atyn máńgi saqtaý úshin elorda ataýyn ózgertýdi usynǵan bolatyn. Bul usynysty Parlament pen qalalyq máslihat depýtattary biraýyzdan qoldaǵan edi.
