Foto: Ulysmedia.kz
Májilis depýtaty Janarbek Áshimjan bastaǵan depýtattar aqparattyq qaýipsizdik máselesin kóterip, Úkimet basshysy men Bas prokýratýraǵa saýal joldady, dep habarlaidy Ulysmedia.kz.
«Áleýmettik jelilerde jeldei esken keibir jel sóz ben alypqashpa ósek-aiań áńgimeler memlekettik qundylyqtardy devalvatsiiaǵa quldyratatynyn tóńiregimizde mysal az emes. Osy oraida QR bas prokýratýrasynyń aqparattyq qaýipsizdikke qatysty joldaǵan úndeýi ulty men ulysyna, tegi men jynysyna qaramastan búkil respýblika jurtshylyǵyn alańdatýǵa tiis dep sesepteimiz!» - deidi ol.
Depýtat «sózdi aýzyńnan shyqqansha sen basqarasyń, al aýzyńnan shyqqan soń ol seni basqarady» degen támsildi keltiredi. Aitýynsha, eldi ekiudai kúige túsirip, jolynan jańyldyratyn jalǵan aqparat – jas balanyń qolyndaǵy ustara sekildi. Ne ózi arandaidy, iaki ózgeni arandatady.
«Ózderińizge málim, sońǵy kezderi ómirimizge dendep engen jańa media, túrli áleýmettik jelilerde buqarany joldan taidyrýǵa baǵyttalǵan jalǵan aqparattar tasqyny jiilep ketti. Túrli blogerler men esim-soiyn jasyrǵan ártúrli akaýnttar, jeń ushynan jalǵasqan bottar eldiń tynyshyn qashyryp, alaýyzdyqtyń shoǵyn úrleýge jol berýde. Jalǵan málimetter taratyp, eldiń qulaǵyn kóterip, memlekettiń ishki turaqtylyǵyn shaiqaltýǵa múddeli teris piǵyldylar da joq emes», - deidi ol.
Janarbek Áshimjan qazir búkil dúnie ottan kóilek kiip tur deidi. Prezidenttiń «bizge syrtqy jaý da, ishki alaýyzdyq ta kerek emes, bizdiń baǵytymyz birlik pen turaqtylyq» degenin eske salady.
«Ásirese, milliondaǵan jazylýshysy bar blogerler men internet resýrstar jetekshileriniń memleketshildik jaýapkershiligi mańyzdy. El ishin alataidai búldirip, bólshekteýge, alaýyzdyqty qozdyrýǵa, jalǵan aqparat taratýǵa jasalǵan árbir qadamǵa quqyqtyq turǵydan qatań baǵa berilý kerek. Mundai feik aqparattar birinshi kezekte qoǵamdy turaqsyzdandyryp, janjaldy arttyryp, memlekettik apparattyń qalypty jumys yrǵaǵyn buzýǵa, eldiń tynyshyn qashyrýǵa baǵyttalatyny daýsyz. Otandyq aqparattyq óriske shabýyldy uiymdastyrý mehanizmin tiptik dep aitýǵa bolady. Negizinen jalǵan aqparattar eń aldymen túbi kúmándi resýrstarda paida bolady, olar negizinen Qazaqstannan tys jerlerde ornalasqan. Ile-shala feikter barlyq aqparattyq pablikterde jáne blogerler men anonimdi telegramm-arnalar arqyly jańa mediada kórsetiledi. Mundai shemany jaqsy qarjylyq qoldaýsyz júzege asyrý múmkin emes. Sondyqtan túrli joldarmen eldiń ishin iriýtýge baǵyttalǵan mundai jobalardyń artynda Hrapýnov, Abliazov sekildi mysyqtileýler, keshegi «Qańtar qasiretinde» halyqtyń qalqasynda turyp Táýelsizdiktiń tamyryna tas atqan nieti buzyq revanshistik toptardyń turǵany anyq», - deidi ol.
Janarbek Áshimjan feik aqparattardy «taratý» protsesine qarapaiym jeli qoldanýshy azamattar da senip qalyp jatqanyna ókinish bildiredi. «Jańalyqty» alǵannan keiin olar ony birden týystaryna, tanystaryna bólisedi, osynyń saldarynan qoǵam turaqtylyǵyn buzýǵa jasalǵan teris áreketterdiń qatysýshysy ekenin sezinbeidi. Osy sebepti, «eldegi aqparattyq keńistiktiń shynaiylyǵyn, ádilettiligin, tazalyǵyn turaqtandyrý úshin» depýtattar mynadai qadamdar jasaý qajet dep sanaidy:
- Birinshi. Ýákiletti organdar kez kelgen máselege sátinde quqyqtyq baǵa berip, qoǵamdy, eldi shynaiy aqparattarmen qamtamasyz etý kerek. Sonymen qatar, zamanaýi tehnologiialar úshin túbi shiki, shetten qarjylyq qoldaý alatyn anonimderdiń jeke basyn anyqtap, arandatýshylardyń is-áreketine ashyq túrde baǵa berý qajet.
- Ekinshi. Memlekettik organdar aqparat beredi, biraq onyń jiiligi, eń bastysy taralý jyldamdyǵy joǵaryda sipattalǵan shemamen salystyrýǵa kelmeidi. Sondyqtan el Táýelsizdigi men memlekettiń turaqtylyǵyn, aqparattyq qaýipsizdikti qamtamasyz etetin BAQ-tardyń jumysyn kásibi deńgeide uiymdastyrý kerek.
