Kitap shyǵaratyn, film túsiretin kompaniialarǵa arnaiy ekonomikalyq aimaq rejiminde jumys isteýge múmkindik berý qajet. Mundai usynysty búgin Senattyń jalpy otyrysynan keiin QR Premer-Ministri Baqytjan Saǵyntaevtyń atyna depýtattyq saýal joldaǵan senator Birǵanym Áitimova jasady, dep habarlaidy QazAqparat tilshisi.
«Baspa isi rýhani qundylyqtardy jaryqqa shyǵarý arqyly materialdyq igilikterge ie bolýdyń bir joly bolyp tabylady. Qazaqstandaǵy kitap óndirisi men baspa isi elimiz Táýelsizdik alǵannan keiingi jyldarda túbegeili ózgeristerge túskeni bárimizge belgili. Burynǵy bir ortalyqqa baǵynǵan memlekettik baspalar men poligrafiialyq kásiporyndar jekeshelendirildi, básekelestik ortaǵa berildi. Sóitip, naryqtyq ekonomikaǵa bet burǵan tusta kitap pen baspa salasy qiyn jaǵdailarǵa tap keldi. Kitap shyǵarý kúrt kemidi», - dedi Birǵanym Áitimova senator Dariǵa Nazarbaevamen birge ázirlegen depýtattyq saýalyn joldai kele.
Onyń sózine qaraǵanda, baspalar kitap naryǵyn jańa zamanǵa beiimdeýdi endi qolǵa alyp jatyr. Qazirgi kezde baspalar mátin terýden bastap, redaktsiialaý, túzeý siiaqty qyzmettermen qatar, túpteý, basyp shyǵarý, sońynda satý, taratý isterin de bir ózderi atqarady. Zamanaýi tehnologiialarmen jabdyqtalǵan baspahanalary bar. Ári jeke saittary jáne sol arqyly onlain tapsyrys jasaý múmkindikteri qarastyrylǵan.
«Kitap shyǵarý men taratýdy naryq qatynastaryna beiimdep jańa deńgeige kóterý - eń aldymen, osy jumyspen tikelei ainalysatyn baspagerlerdiń mindeti ekendigi biz aitpasaq ta túsinikti. Soǵan orai, baspagerler qaýymy da óz jumystaryn qazirgiden nyǵaityp, jańa deńgeige kóterýi qajet. Bolashaqta naryq zańynyń talaptary barynsha qataiady», - dedi ol.
Sonymen qatar depýtat kino túsirý salasyna jumsalatyn investitsiialar kólemi de jyl saiyn artyp kele jatqanyna nazar aýdartady.
«Ulttyq kinematograf Eýropa, Aziia jáne Amerikadaǵy óner ortalyqtarynan seriktesterdi kóptep taba bastady. Eýropa men Aziia arasynda jatqan Qazaqstannyń geografiialyq jaǵdaiy kinofilm túsirýde halyqaralyq yntymaqtastyqty jemisti túrde jolǵa qoiýǵa keń múmkindik beredi. Mamandardyń aitýynsha, sońǵy úrdis bolashaqta eldegi kino ónerkásibiniń kóptegen tabystarǵa jetýine jol ashady», - dedi senator.
Onyń dereginshe, eldegi kino naryǵynyń aýqymy tar bolyp jáne jergilikti kinostýdiialar túsirgen filmderdi jurtqa kórsetýden túsetin paida jalpy kassalyq túsimniń on paiyzyna da jetpeidi. Al reseilik distribiýtorlar Qazaqstanǵa eksporttap otyrǵan Gollivýd stýdiialarynyń filmderinen túsetin paida kassalyq túsimniń shamamen jetpis paiyzyn quraidy.
«Osy bir ahýal Qazaqstan kino ónerkásibi salasyndaǵy kásipkerlerdiń film túsirýde halyqaralyq yntymaqtastyqty damytýǵa umtylýyna túrtki bolyp otyr. Sebebi qoiylymdy el aýmaǵynda kórsetý arqyly kinofilm túsirýge ketken qarjyny keri qaitarýǵa bolady», - dep esepteidi B.Áitimova.
Osyǵan bailanysty, ol memleket tarapynan kitap shyǵarýmen jáne kinoóndirisi qyzmetterine qatysy bar salalardy damytý máselelerine erekshe nazar aýdarý qajettigin atap ótti. Óitkeni qazirgi ýaqytta bul salalar óziniń damýyn qajet etýde, úlken qarjylyq jáne shyǵarmashylyq resýrstardy talap etedi. Osy salalardy damytý arqyly, otandyq kitap jáne kino ónimmen toltyrý múmkin bolady.
«Qazirgi ýaqytta elimizde qyzmettiń basym túrlerin júzege asyrý úshin 11 arnaiy ekonomikalyq aimaqtar jumys isteidi. Aimaqtarda arnaiy quqyqtyq rejim qoldanylady, shekaralary naqty belgilengen, kompaniialarǵa memleket tarapynan qurylymdalǵan yntalandyrý paketin usynady. Aimaqtar qazirgi zamanǵy ónimdiligi joǵary, básekege qabiletti óndiristerdi jedel damytý, ekonomika salalaryna jáne óńirlerge investitsiialar, jańa tehnologiialar tartý, sondai-aq halyqty jumyspen qamtýdy arttyrý maqsatynda qurylǵan. Aimaq qatysýshylary úshin Salyq kodeksinde jáne «Qazaqstan Respýblikasyndaǵy arnaiy ekonomikalyq aimaqtar týraly» Zańynda korporativtik tabys salyǵyna, jer salyǵyna, múlik salyǵynan bosatý, qosylǵan qun salyǵyna jeńildikter kózdelgen. Qurmetti Baqytjan Ábdiruly, joǵaryda aitylǵandardy eskere otyryp, Sizden kitap óndirisi men baspa isi, kinoóndiris salalary boiynsha otandyq kompaniialardyń aimaq rejiminde jumys isteý múmkindigin qarastyrýdy jáne osy máseleni normativtik quqyqtyq retteý jóninde tiisti sharalar qabyldaýdy suraimyz», - dedi senator.
