Senat depýtattary kámeletke tolmaǵan balalardy mitingke ertip aparatyn adamdardy 100 AEK aiyppul salý nemese on táýlikke deiin ákimshilik qamaýǵa alýdy usynyp otyr, dep habarlaidy Sputnik Qazaqstan.
Senattyń jalpy otyrysynda depýtattar "Qazaqstannyń keibir zańnamalyq aktilerine memlekettik qyzmet jáne sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly zań jobasyna balalardy mitingige ertip baratyndardy jaýapqa tartýdy kózdeitin norma engizdi.
Senattyń túsindirme jazbasynda aitylǵandai, 2014 jylǵy 5 shildedegi Ákimshilik quqyq buzýshylyq týraly kodekstiń 128-baby mynadai redaktsiiada jazylmaq.
"Kámeletke tolmaǵan adamdy Qazaqstan zańnamasyn buza otyryp ótkiziletin jinalystarǵa, mitingilerge, sherýlerge, demonstratsiialarǵa jáne qoǵamdyq, toptyq nemese jeke múddelermen qarsylyq bildirýge tartýǵa bolmaidy. Muny buzǵandarǵa 100 ailyq eseptik kórsetkish mólsherinde aiyppul salynady nemese 10 táýlikke deiingi merzimge ákimshilik qamaqqa alynady" delingen.
Al osy is-áreketterdi qospaǵanda, kámeletke tolmaǵan balany ákimshilik quqyq buzýshylyq jasaýǵa tartqandarǵa 50 AEK mólsherinde aiyppul salynady.
Túsindirme hatta kórsetilgendei, azamattar balany sanktsiialanbaǵan mitingke shyǵarý arqyly onyń densaýlyǵyna jáne psihikalyq turǵydan ornyqty damýyna nuqsan keltiredi.
"Osyǵan bailanysty ruqsat berilmegen aktsiialarǵa kámeletke tolmaǵandardy tartqany jáne paidalanǵany úshin ákimshilik jaýapkershilik usynylyp otyr", - deidi depýtattar.
Aita ketsek, qoldanystaǵy ákimshilik quqyq buzýshylyq týraly kodekstiń 128-babynda kámeletke tolmaǵan balalardy ákimshilik quqyq buzýshylyq jasaýǵa tartqandarǵa 50 AEK aiyppul salynatyny aiqyn jazylǵan. Endi depýtattar bul bapqa mitingter men demonstratsiialardy qosyp otyr.
Buǵan deiin Senat depýtaty Sáýle Aitpaeva 16 jasqa tolmaǵan balalaryn mitingige ertip shyǵatyn ata-analardy jaýapqa tartýdy usynǵan edi.
