Baǵaly metaldardyń zańsyz ainalymy úshin jaza zańnamalyq túrde kúsheitiletin bolady, dep habarlaidy "Ult aqparat" tómengi palatanyń baspasóz qyzmetine silteme jasap.
Búgin Nurlan Nyǵmatýlinniń tóraǵalyǵymen ótken jalpy otyrysta reiderlikke qarsy kúresti kúsheitý, kásipkerlik qyzmetti memlekettik organdar men laýazymdy adamdardyń zańsyz aralasýynan qorǵaý jáne baǵaly metaldardyń zańsyz ainalymyna kedergi keltiretin sharalardy kúsheitý máseleleri týraly zańnamalyq túzetý I oqylymda maquldandy.
Zań jobasyn talqylaý barysynda Nurlan Nyǵmatýlin jýyq arada ǵana Eýraziialyq ekonomikalyq odaq sheńberinde baǵaly metaldarmen jáne asyl tastarmen operatsiialardy júzege asyrý erekshelikteri týraly kelisimdi qaraǵanyn, sol kezde Qazaqstanda EAEO boiynsha seriktesterimizden – Resei men Belarýsten aiyrmashylyǵy baǵaly metaldardyń zańsyz ainalymy salasynda jasalǵan qylmystar úshin «Nege qylmystyq jaýapkershilik joq?» - degen suraq týyndaǵanyn atap ótti. Nátijesinde, tek ákimshilik jaýapkershilik qarastyrylǵany anyqtaldy.
Bul osy saladaǵy qylmystyq belsendiliktiń keń kólemde ósýine ákelgeni anyq. Máselen, tek Stepnogorsk óńirinde 2015-2020 jyldar aralyǵynda quramynda altyny bar zańsyz óndirilgen 6 357 tonna shikizat tárkilendi, - dedi Palata Spikeri.
Nátijesinde N. Nyǵmatýlin el ekonomikasyna, onyń ishinde salyqtardyń, biýdjetke tólenetin basqa da mindetti tólemderdiń tolyq túspeýi túrinde eleýli zalal keltirilgenin atap ótti. Sondai-aq, osy zańnamalyq túzetýlerdiń nátijesinde oń ózgerister bolatynyna senim bildirdi.
Tutastai alǵanda, zań jobasynyń normalary azamattardyń quqyqtaryn qorǵaýdy arttyrýǵa, prokýratýranyń qadaǵalaýyn kásipkerlerdiń problemalaryn tiimdi sheshýge qaita baǵdarlaýǵa múmkindik beredi, kásipkerliktiń óz qyzmetine zańsyz aralasýdan, biznes sýbektilerin qylmystyq qýdalaý aiasyna tartýdan kepildikterin kúsheitedi, sondai-aq osy túzetýler baǵaly metaldardyń zańsyz ainalymyna qarsy kúresti kúsheitýge múmkindik beredi.
