Oraldyń máslihat depýtattary Jelaev jáne Krýgloozernoe aýyldyq okrýg ákimderin sailady. Al sársenbide 12 aýdandyq máslihat depýtattary 93 aýyldyq okrýg ákimderin sailamaq.
Ortalyq sailaý komissiiasynyń dereginshe, Batys Qazaqstan oblysynda (BQO) aýyl ákimderin sailaý ekinshi ret ótip jatyr. Aýdan ákimderi usynǵan kandidattarǵa aýdandyq máslihat depýtattary daýys beredi. Bul sailaýda qyzmetin tórt jyl atqarǵan ákimderdiń ornyna sailaý ótedi.
ORYNDALMAǴAN ÝÁDELER
Oral qalasynan 25 shaqyrym jerde ornalasqan Krýgloozernyi aýyly qalaǵa jatady. Munda bes jarym myńnan kóp adam turady. Jumysqa jaramdy halyqtyń kóbi Oralǵa attanady.
Tamyzdyń 7-sinde qalalyq máslihattyń 13 depýtaty aýyldyń jańa ákimine daýys berdi. Oblystyq jastarmen jumys jónindegi resýrstyq ortalyq basshysy, 33 jastaǵy Kenesary Nurshinov ákim boldy.
Sailaýdan bir kún buryn Azattyq aýyl turǵyndarynan qala ákimi usynǵan úsh kandidatty – «Batys sý arnasy» sýmen qamtý kommýnaldyq kásiporny ýchaskesi bastyǵy Teljan Esetovti, jergilikti mektep direktory Aslan Shaharovty jáne Nurshinovty tanisyzdar ma?» dep suraǵan edi. Aýyl turǵyndary sailaý bolatynyn estimegen bolyp shyqty.
— Mundaǵy jurtpen ylǵi sóilesip júrmin, biraq sailaý ótkenin senen estip turmyn, - deidi jergilikti taksist Baqytjan Imanǵaliev. – Aldyńǵy ákimniń esimi Saltanat ekenin estigenmin, biraq ózin eshqashan kórmeppin. Al onyń aldynda Aman Nuryshev ákim bolǵan. Mine, sol kisi «Opel» kóligimen aýyldy aralap júretin. Ony kúnine bir ret bolsa da kóretinbiz. Al odan keiingi ákimderdiń ishinen halyqpen aralasqan ákimdi kórmeppin, - deidi taksist.
Baqytjannyń pikirinshe, aýyl turǵyndary úshin eń kókeikesti másele – Krýgloozernyi aýylyna kireberistegi úsh kilometr qiraǵan jol.
— Shuńqyrlardy kórgen shyǵarsyz? Kúz ben kóktemde ol jermen júre almai qalamyz. Jaz bolsa aiaqtalyp qaldy, jol áli joq. Al salyqty ýaqytynda tóleimiz, - dep shaǵynady Imanǵaliev.
— Olary kim eken? Nemen ainalysady? Olardy sailaǵannan ne paida? Tipti qaisysyn bolsa da... Qora-qopsymnan aýylǵa deiingi úsh shaqyrym joldy qardan tazalaýdy surap, ákimderge qys saiyn telefon soǵýyma týra keledi. Olar moinymda memleketten alǵan nesie bar ekenin biledi, olarmen sonda da janjaldasamyn. Bul 1989 jyldan beri jalǵasyp keledi, - deidi kásipker.
Krýglozernyi aýyldyq okrýgi tikelei qaraityn ákimdik aýyldan bes shaqyrym jerdegi kórshi aýyl Serebriakovte ornalasqan. Demalys kúni ákimdikte eshkim joq bolyp shyqty. Aýyldyq okrýg ákimi mindetin ýaqytsha atqarýshy Tatiana Sýmkinany jumys orynnan da, úiinen de taba almadyq.
2016 jyldyń kúzinde Oral qalasynda jol politsiiasy aýyldyń burynǵy ákimi Saltanat Eskendirovti mas kúiinde kólik júrgizgeni úshin ustaǵan. Ákimdi úsh jylǵa júrgizýshi kýáliginen aiyrǵan. Oblystyq memlekettik qyzmetshi etikasy keńesi oǵan «qatań sógis» jariialaýdy usynyp, Eskendirov qyzmetinen ketken.
Biylǵy qańtardyń 19-ynda Krýgloozernyi aýylynyń halqyna esep berý jiynynda Oraldyń sol kezdegi ákimi Nariman Tóreǵaliev turǵyndarǵa joldy «qarajat taýyp, jóndetýge tyrysamyn» dep ýáde etken. Biraq qyzmetin bir jyldai atqarǵan Tóreǵaliev senat depýtatyna ainalyp, Astanaǵa ketti. Al joldy jóndeý sol kúii bastalǵan joq.
Jergilikti ákimdiktiń 2017 jyldyń alty aiynda atqarǵan jumysy týraly esepte aýylǵa kireberistegi úsh shaqyrym joldy jóndeý jaily aitylmaidy.
ORNYNDA QALǴAN ÁKIMDER
Depýtattar týǵan aýylynyń ákimin sailap jatqanda zeinetker Merýert Saparova shyjyǵan kúnniń astynda Jelaev aýyly aialdamasynda №14 avtobýsty kútip otyr. Onyń aitýynsha, avtobýstar ár 45 minýt saiyn júredi. Demalys kúnderi úlken avtobýstar júrmeidi, jolaýshylar syimai qalatyn shaǵyn «Gazelder» ǵana júredi eken. Zeinetker sailaý týraly estimegen, kandidattardy tanymaidy.
— Bizde bári jaqsy, tek avtobýs jaǵy qiyn. Qalaǵa túske taman jetý úshin úiden tańerteń shyǵýyń kerek. Qystyń kúni jáne jaýyn-shashynda balalar men qarttarǵa qiyn. Ákim jurtty uiymdastyra bilse boldy, bizde halyq jaqsy, - deidi zeinetker.
Dúisenbide qalalyq máslihat depýtattary Jelaev aýyldyq okrýginiń qazirgi ákimi Timýr Áshiǵalievti qoldap, bir aýyzdan daýys berdi. Qaramaǵyndaǵy qyzmetkeri, aýyldyq okrýg ákimi apparaty bólim bastyǵy Nurlan Baǵysqaliev pen Oral qalalyq jer qatynastary bólimi bastyǵynyń orynbasary Maksim Tilegenov onyń básekelesteri boldy.
Ákimdi jumys ornynan jolyqtyrýdyń sáti túspedi, ákimdiktiń qabyldaý bólmesinen «ol demalysta» dep habarlady.
Oral qalasynan bes shaqyrym jerdegi Jelaev - 2283 adam turatyn shaǵyn aýyl. Biyl qańtarda halyqqa ákim bergen sońǵy esepke sáikes, kentte 67 siyr (2016 jyly 75 bas bolǵan), 113 qoi-eshki, 58 shoshqa men 842 úi qusy bar. Aýyl men qala arasynda «PAZ» markaly eki avtobýs pen alty «Gazel» kóligi qatynaidy.
Jelaev turǵyndary qoǵamdyq kólik jetispeitini jaily ákimniń esep berý jiyndarynda eki jyl qatarynan shaǵymdanǵan. Biraq jaǵdai ózgergen joq.
Aýyl ákimderin sailaýǵa qatysty kommentariinde Jalpyulttyq sotsial-demokratiialyq partiianyń (JSDP) oblystyq filialynyń jetekshisi Qadisha Muqanova «ákimderdi aýyl turǵyndarynyń ózderi sailaǵany aýyldyq okrýg úshin jaqsy» deidi.
— Ákimdikke usynylǵan kandidattar aýyldy, onda turatyn halyqty jáne ol jerdiń qyr-syryn jaqsy bilgeni mańyzdy. Ol orynǵa bir jaqtan ákelip qoia salmai, ondai adamdardy daiyndaý kerek, - deidi Muqanova.
Oblys ákimdigi saitynda ákimdikke kandidattar tizimi sailaý bastalardan úsh kún buryn – tamyzdyń 4-inde jariialandy. Aýdandardaǵy 95 aýyldyq okrýg ákimi qyzmetine kandidat retinde qazirgi 64 ákim usynyldy. 285 kandidattyń ishinde jeteýi ǵana memlekettik qyzmetker emes.
Sanat Oryn Áli, Azattyq
