Foto: Tengrinews.kz
Qazaqstan halyqtyq partiiasynyń depýtattary ataýly áleýmettik kómekti (AÁK) alyp tastaý kerek dep sanaidy, óitkeni ony alý protsesi kúrdeli. Olar bul máselege qatysty óz ýájderin vitse-premer Altai Kólginovke joldaǵan saýalynda aitty, - dep habarlaidy Tengrinews.kz saity.
"AÁK-ke úmitker bolý úshin kópbalaly, jumys istemeitin analarǵa júzdegen synaqtan ótý kerek. Ádette áielder biýrokratiia men memlekettik organdardyń áýre-sarsańynan sharshaidy. AÁK-ti alyp tastaý eń jaqsy sheshim bolmaq. Onyń ornyna balalarǵa tólenetin járdemaqynyń mólsherin arttyrý qajet", - dedi Tanasheva vitse-premer Altai Kólginovke joldaǵan depýtattyq saýalynda.
Depýtattardyń esebi boiynsha, bul jaǵdaida tórt balaǵa beriletin járdemaqy 280 myń teńgeni, eki balaǵa 140 myń teńgeni quraidy. Al búginde tórt balaǵa tólenetin járdemaqy 55 340 teńge nemese ár balaǵa aiyna 13 826 teńge.
"Bul áleýmettik qoldaýdyń aqylǵa qonymsyz mólsheri. Munda infliatsiianyń turaqty ósýi, ekonomikalyq turaqsyz jaǵdai, baspananyń joqtyǵy jáne halyqtyń osy sanatyndaǵy adamdardyń turaqty jumyspen qamtylmaǵany eskerilmegen. Biz eń tómengi jalaqy mólsherinde ár balaǵa aiyna 70 myń teńge memlekettik járdemaqy taǵaiyndaýdy qarastyrýdy usynamyz", - deidi Tanasheva.
