Depýtattar Astananyń ataýyn ózgertý týraly usynysty qaita kóterdi

Depýtattar elimizdiń bas qalasy Astanany Prezident Nursultan Nazarbaevtyń qurmetine ataý týraly usynysty qaita kóterdi, dep xabarlaidy QazAqparat.

Búgin ótken Parlament palatalarynyń birlesken otyrysynda depýtattar Konstitýtsiiaǵa ózgerister engizý týraly usynystarymen bólisti. Sonyń biri - Astana ataýyn ózgertý. Senator Darxan Káletaev Astananyń ataýyn Nazarbaevtyń qurmetine ózgertý jóninde bastama kóterdi.

"Men 2008 jyly Astana halyqaralyq áýejaiyn Tuńǵysh Prezident - Ult Kóshbasshysy Nursultan Nazarbaevtyń qurmetine ataýdy usynǵan bolatynmyn. Atalmysh usynys qoǵam arasynda qyzý talqylandy jáne sol kezde edáýir qoldaýǵa ie boldy. Sondyqtan Tuńǵysh Prezident esimin elorda ataýynda jáne elimizdiń ózge de nysandarynda kórinis tabýy týraly usynystar der ýaqytynda aitylyp otyr jáne búginde óte ózekti", - dedi Darhan Káletaev.

Áriptesiniń bul usynysyn depýtat Pavel Kazantsev ta qoldady.

Onyń oiynsha, bul bastama Elbasynyń memleket táýelsizdigi jyldary qosqan úlesi men eńbegine berilgen ádil baǵa.

Aita keteiik, búgin Parlamenttiń birlesken «Qazaqstan Respýblikasy Konstitýtsiiasyna ózgerister men tolyqtyrýlar engizý týraly» QR Zańynyń jobasy talqylanýda. Otyrys barysynda QR Prezidenti baiandama jasady.

Esterińizge salaiyq, Astana qalasynyń ataýyn ózgertý týraly másele depýtattar tarapynan buǵan deiin de kóterilip, biraq Memleket basshysy oǵan óziniń qarsylyǵyn jetkizgen bolatyn.