Depýtattar Almaty oblysy ákiminiń jumysyna qanaǵattanarlyq degen baǵa berdi. Bul týraly búgin ótken oblystyq máslihattyń XXI sessiiasynda belgili boldy.
Kún tártibindegi basty suraq – oblys ákiminiń oblystyq máslihat depýttarynyń aldynda ótken 7 aida atqarylǵan jumystardyń qorytyndysy boiynsha esep berýi boldy.
Oblys ákimi Amandyq Batalovtyń sózine súiener bolsaq, jergilikti atqarýshy organdardyń esep berý kezeńindegi jumysy negizinen Memleket basshysynyń tapsyrmalary men belgilengen mejege jetkizetin maqsattyq indikatorlardy oryndaýǵa baǵyttaldy. Atqarylǵan jumystardyń nátijesinde oblystyń 7 aidaǵy áleýmettik-ekonomikalyq damýynda ósim baiqalady. Negizgi salalar boiynsha kórsetkishterdiń jaqsarýyna bailanysty ekonomikanyń ósimi 2 % jyldyq boljammen salystyrǵanda 2,8 % qurady. Atap aitar bolsaq, ónerkásiptik óndiris kólemi 4,3% ósip, 396 mlrd. teńgege jetti. 32 jańa kásiporyndy iske qosý men jumys jasap turǵan óndiris oryndaryn keńeitýdiń arqasynda qosymsha 867 jumys orny ashyldy. Indýstrialandyrý kartasy boiynsha buǵan deiin iske asyrylǵan 51 jobanyń 43-i óziniń josparly qýatyna shyqty. Qazirgi ýaqytta qalǵan kásiporyndardy tolyq qýatyna jetkizý baǵytynda jumystar júrgizilýde.
Sonymen qatar, óńir basshysy Ult josparynyń 55-56 qadamdaryn iske asyrý aiasynda oblysqa 7 transulttyq kompaniialar tartyldy. Osy jobalardy iske asyrý arqyly óńirimizge 160 mlrd. teńge investitsiia tartylyp, qosymsha 2 000 jumys orny ashylatyn bolady. Jalpy aǵymdaǵy jyldyń 7 aiynda oblysqa 205,9 mlrd. teńge investitsiia tartyldy. «Nurly jol» jáne «Nurly jer» baǵdarlamalaryn iske asyrý sondai-aq, ónerkásip, agroónerkásiptik keshen, gazdandyrý, energetika salalary boiynsha birneshe jobalardy júzege asyrýdyń nátijesinde jyl sońyna deiin bul kórsetkish 537 mlrd. teńgege artady dep kútilýde.
Osydan keiin óńir basshysy A. Batalov aýylsharýashylyǵy, áleýmettik sala, týrizm, shaǵyn jáne orta biznesti qoldaý, infraqurylymdy damytý, turǵyn úi qurylysy, gazdandyrý jáne ózge de mańyzdy salalar men baǵyttar boiynsha jetistikterdi atap ótti.
Baiandama barysynda «Rýhani jańǵyrý» baǵdarlamasyn júzege asyrý jáne osy baǵdarlama negizinde iske asyrylyp jatqan jobalarǵa úlken kóńil bólindi.
Oblys ákiminiń baiandamasyn tyńdap bolǵannan keiin, depýttar jaryssózge kóshti. Sóz sóilep, pikir bildirgender qatarynda oblystyq máslihattyń depýtattary Ermek Kelemseiit, Rahat Ybraiymova jáne Jankeldi Osan boldy.
Jaryssózdiń qorytyndysy boiynsha depýttar bir aýyzdan oblys ákiminiń ótken merzim aralyǵynda atqarǵan jumysyn qanaǵattanarlyq dep baǵalady.
