Foto: qamqor.gov.kz, video kadry
Májilis depýtaty Elnur Beisenbaev Qaraǵandyda jedel járdem júrgizýshisin soqqyǵa jyqqan kúdiktini qatań jazaǵa tartýdy surady, dep habarlaidy "Ult aqparat" Kazinform agenttigine silteme jasap,
«Ókinishke qarai, sońǵy kezde zańdy belden basyp, oiyna kelgenin isteitin betimen ketkender kóbeidi. Kúni keshe Qaraǵandyda bolǵan oqiǵa – sonyń aiqyn dáleli. Aidyń-kúnniń amanynda óz qyzmetin adal atqaryp júrgen jedel járdem júrgizýshisin qanjosa etip soqqyǵa jyǵý – baryp turǵan bassyzdyq. Quqyq buzǵan Nurbolat Dákebaevtyń bul áreketi – jái ǵana qylmys emes, búkil qoǵamǵa, zań men tártipke ashyq qarsylyq, ne istei alasyń degen dóń aibat. Ózin beinetaspaǵa túsirip jatqanyn bilip tursa da, eshqandai aiylyn jimai judyryq siltep, qyzmettegi adamdy qanǵa bóktirýi – ábden shekten shyqqandyq, naǵyz qanypezerlik. 1 jasar sábige kómekke kelgen meditsina qyzmetkerlerin, ashyqtan-ashyq, kýágerlerdiń kózinshe uryp-soǵý ne degen sumdyq? Osyndai oqiǵalar elimizde jeterlik. Osy kúnge deiin Depýtattyq korpýs birneshe ret meditsina júiesiniń qyzmetkerlerin qorǵaý úshin arnaiy statýs bekitýdi usynsa da, Úkimet áli kúnge deiin sheshim qabyldamady», - dedi Beisenbaev Úkimet basshysy Álihan Smaiylovtyń atyna joldaǵan saýalynda.
Onyń aitýynsha, adam ómirin saqtaý úshin arpalysatyn aqhalatty jandardy arnaiy qyzmet kórsetýshi ókil retinde zańmen qorǵaý kerek.
«Bul bir ǵana oqiǵa emes. Almatyda avtobýs júrgizýshisin soqqyǵa jyǵýdyń qandai qaiǵyly jaǵdaiǵa ákelgenine bárimiz kýá boldyq. Bul jariia bolǵandary ǵana. Jabýly qazan jabýly kúiinde qalǵandary qanshama. Sondyqtan mundai jaǵdaiǵa múldem jol berýge bolmaidy. Búgin Dákebaev, erteń kim bolady sonda?! Bul jaǵdai neni kórsetip otyr? Eń aldymen, tiisti organdardyń óz jumysyna salǵyrt qarap, quqyq buzýshylyqtardyń aldyn alý sharalaryn durys uiymdastyrmaǵanyn kórsetedi. Ekinshiden, kópshilik qarapaiym ǵana quqyqtyq qaǵidalardy bilmeitinin baiqatady. Olar óz quqyǵyn bylai qoiǵanda, zań aldyndaǵy mindetteri men jaýapkershiliginen de habarsyz. Zań men tártip bárine birdei qaǵidatyn ustaný – árbirimizdiń mindetimiz. Úshinshiden, ulttyq qundylyqtardan ada, qazaqi ádep pen ar-uiatty umytqan, adamshylyqqa jat oilarmen sanasy ýlanǵan azamattar qalyptasyp keledi. Saldaryn kórip otyrmyz. Bul jaǵdai eshqandai jaqsylyqqa aparmaidy», - dedi depýtat.
Bul turǵyda ol ýákiletti organdarǵa kelesi sharalardy qolǵa alýdy usyndy:
1. Quqyq qorǵaý organdary qylmys jasaǵan Dákebaevty tez arada tabýy tiis.
2. Nurbolat Dákebaevtyń sotyn ashyq júrgizip, qatań jaza berý jáne onyń barysy men qorytyndysy týraly buqaralyq aqparat quraldary arqyly halyqty túgel habardar etý.
3. Keiingi ýaqyttary adamnyń jeke basyna qaýip tóndiretin, tipti onyń ómirin qiiatyn qylmystar qoǵamdyq sipat alyp jatyr. Sondyqtan tez arada kez kelgen qylmystarǵa qoǵamdy múldem tózbeýshilik mádenietin jappai qalyptastyrýymyz qajet.
Budan buryn Qaraǵandyda er adam jedel járdem júrgizýshisin soqqyǵa jyqqanyn habarlaǵan edik.
