sýret ashyq derekkózden alyndy
Májilis depýtaty Gúldara Nurymova dárihanalarǵa arnalǵan GPP standartyn erikti túrde engizýdi usyndy, dep habarlaidy Sputnik Qazaqstan.
Onyń aitýynsha, aýyldyq eldi mekenderde ornalasqan shaǵyn dárihanalardyń ielerin jyl basynan beri halyqaralyq GPP standartynyń engizilý máselesi mazalap júr.
Depýtattyń aqparatynsha, elimizde 10,5 myń dárihana bar, sonyń tek 8 paiyzy ǵana GPP talaptaryna sai keledi.
"Osy talaptyń kesirinen shaǵyn dárihanalar jabylýǵa májbúr, al olardyń qyzmetkerleri jumyssyzdar qataryn tolyqtyrmaq. Búgingi tańda 150 dárihana jabyldy jáne 300-ge jýyq dárihana jabylý ústinde tur. Bul kórsetkish tek óse bermek. Bir shaǵyn dárihana bir otbasyn asyraidy", - deidi Nurymova vitse-premer Altai Kólginovke joldaǵan depýtattyq saýalynda.
Depýtat eldegi dárihanalar úshin qoldanystaǵy erejeler men normalar jetkilikti, taǵy da basqa talaptar men erejelerdi engizýdiń qajeti joq dep sanaidy.
Aitýynsha, jumys istep turǵan barlyq dárihanada litsenziia bar jáne sanitarlyq erejeler men normalarǵa sai dáriniń durys saqtalýy úshin qajetti jaǵdaidyń barlyǵy saqtalǵan.
"Biraq osyǵan qaramastan taǵy qosymsha talaptar engizilmek. Mysaly, jumys isteitin 6 jýrnaldyń ornyna kún saiyn 18-den 32-ge deiin jýrnal júrgizý, kosymsha shtat engizý, shúberekterdiń tús shemasyna qoiylatyn talaptar. Dárihana kiltterin berý jýrnalyn toltyrý dári-dármektiń sapasyna qalai áser etedi? Olardyń negizgi bóligi is júzinde jumys istemeidi, biraq jasandylyq úshin toltyrylady", - dep ashýlandy halyq qalaýlysy.
Nurymovanyń málimetinshe, bir dárihanaǵa GPP standartyn engizý úshin shamamen 5 million teńge qajet. Standart qosymsha qymbat jabdyq satyp alýdy, jihaz jańartýdy jáne jalǵa beriletin bólmelerdi qaita qurýdy talap etedi.
"Atalǵan standartty engizý dári-dármektiń qunyna qatty áser etedi – baǵa kem degende 27-30%-ke kóteriledi. Keibir dári-dármek satylymnan joǵalady jáne bul adamdardyń densaýlyǵyna keri áser etetini sózsiz", - dep málimdedi depýtat.
Budan bólek jańa standarttyń engizilýi naryqtyń monopoliialanýyna, dári-dármektiń kóleńkeli naryǵynyń ulǵaiýyna, jumyssyzdyqtyń artýyna, salyq túsimderiniń azaiýyna alyp keledi.
Osyǵan bailanysty májilismender dárihanalyq standartty erikti túrde engizýdi usyndy.
"GPP standartyn engizýdi talap etetin qosymsha biýrokratiia ne úshin qajet? Joǵaryda aitylǵandar negizinde GPP standartyn engizýdi erikti túrde júrgizý múmkindigin usynamyz", - dep túiindedi sózin Nurymova.
