QR Premer-Ministri
B.Á.Saǵyntaevqa
Qurmetti Baqytjan Ábdiruly!
Bizdiń depýtattyq saýalǵa «Qazaqstan Ardagerleri» Qaýymdastyǵynyń ókili, Keńes Odaǵynyń Batyry Nikolai Kremenishtiń usynys haty negiz bolyp otyr.
Elbasy «Bolashaqqa baǵdar: rýhani jańǵyrý» atty baǵdarlamalyq maqalasynda: «Ájeptáýir jańǵyrǵan qoǵamnyń óziniń tamyry tarihynyń tereńinen bastaý alatyn rýhani kody bolady. Jańa turpatty jańǵyrýdyń eń basty sharty – sol ulttyq kodyńdy saqtai bilý», – dep atap kórsetti.
Bul rette batyr babalarymyzdyń biik rýhy halyq, ásirese, jas urpaq arasynda patriottyq órleý týǵyzyp, ult tarihyna, Otanǵa degen maqtanysh sezimin uialatýda. Sondai ulty ulyq tutatyn, bolmysy batyrlyqpen bite qabysqan tulǵalarymyzdyń biri – Qasym Qaisenov.
Uly Otan soǵysynyń erjúrek batyry, Qazaqstannyń Halyq Qaharmany, aty ańyzǵa ainalǵan dańqty partizan, bilikti barlaýshy, kórnekti jazýshy Qasym Qaisauly Qaisenov 1918 jyly Shyǵys Qazaqstan oblysy Ulan aýdanynyń Asýbulaq aýylynda dúniege keldi.
1940 jyldyń qysynda ásker qataryna shaqyrylady, keiin Máskeý mańyndaǵy áskeri barlaý mektebine jiberiledi. Barlaý isiniń qas sheberi retinde dushpan basyp alǵan aýmaqtarda partizan qozǵalysyn uiymdastyrady, jaýǵa torýyldar jasap, tutqiyldan urys salady.
Qasym Qaisenov Keńes Odaǵynyń Batyry ataǵyna laiyq edi jáne soǵan usynylǵan. 1943 jyly qyrkúiekte Dneprdiń oń jaǵalaýy úshin qan-qasap shaiqasta ol eren erlik jasady, arqyraǵan aryndy ózennen óz partizan otriadymen birinshi bolyp ótip, jaý tylyndaǵy Grigorevka, Lýkovitsy, Zarýbintsy hýtorlaryn tartyp alyp, Qyzyl Armiianyń negizgi kúshteri kelgenshe ólispei-berispei ustap turdy. Alaida sol qyrǵynda aýyr jaraqat alyp, artynsha Dneprden birinshi bop ótkendegi, Býkrin platsdarmyn daiyndaýdaǵy erligi umyt qaldy da, eń joǵarǵy ataq-dárejeler ózgeler qanjyǵasynda ketken. Onyń qujaty araǵa ýaqyt salyp, partizan shtabynyń arhivinen tabylǵan. Q.Qaisenovtyń qaramaǵyndaǵy 13 jaýyngeri Keńes Odaǵynyń Batyry ataǵyn aldy.
1941 jylǵy qarasha – 1944 jylǵy maýsym aralyǵynda Qasym Qaisenov jaý tylyna tórt ret desantpen túsirilgen. Ýkraina, Belorýssiia, Rýmyniia, Karpat taýynda shaiqas júrgizip, jerdi fashisterden azat etýge súbeli úles qosty. 1995 jylǵy 9 mamyrda Elbasy N.Nazarbaev óz Jarlyǵymen Qasym Qaisenovke elimizdiń eń joǵarǵy nagradasy – «Halyq Qaharmany» ataǵyn tabystady. Elbasy óz quttyqtaýyn joldap, elimiz 100 jyldyq mereitoiyn atap ótip otyrǵan Qasym Qaisenovtei qaharmanymyzǵa qansha marapat kórsetsek te, kóptik etpeidi.
Qurmetti Baqytjan Ábdiruly! Joǵaryda aitylǵandy eskere otyryp, Zaisan shekara otriadynyń 2017 áskeri bólimine qarasty shekara zastavasyn «Qasym Qaisenov atyndaǵy shekara zastavasy» dep qaita ataý múmkindigin qarastyrýyńyzdy suraimyn.
Shyǵys Qazaqstandaǵy shekaralyq zastavaǵa tek osy óńirdiń ǵana emes, búkil elimizdiń maqtanyshy sanalatyn batyr Qasym Qaisenovtyń atynyń berilýi alda kele jatqan Uly Otan soǵysyndaǵy Jeńistiń 75 jyldyǵyna úlken tartý bolar edi. Jáne bul eldiń shetinde, jeldiń ótinde júrip, Qazaqstandaǵy beibitshilik pen turaqtylyqty, bal bóbekterdiń tynysh uiqysy men kúmis kúlkisin qorǵaǵan sardarymyz ben sarbazdarymyzdyń rýhyn kóterip, júrekterine maqtanysh sezimin uialatary sózsiz.
Qurmetpen,
QR Parlamenti Májilisiniń depýtaty,
«Nur Otan» fraktsiiasynyń múshesi
Baqytbek Smaǵul jáne ózge de depýtattar
