Foto: gov.kz
Kólik ministri Marat Qarabaev depýtattyń loýkosterlerge áleýmettik bilet engizý usynysyna pikir bildirdi, dep habarlaidy Sputnik Qazaqstan.
Májilis otyrysynda depýtat Aidos Sarym otandyq áýe kompaniialarynyń biletteri tym qymbat ekenin synady. Buǵan Air Astana kompaniiasynyń quramyndaǵy FlyArystan loýkosteri aiqyn mysal bola alady.
Ol áý basta FlyArystan biletterdi qoljetimdi baǵamen alý úshin qurylǵanyn eske saldy. Al is júzinde loýkoster ushaǵyna bilet baǵasy bas kompaniianyń baǵasymen teńesedi, tipti keide asyp túsedi.
"Bir ǵana mysal. Keshe bir jiynǵa áriptesterimiz aiaq astynan bilet satyp alyp, 55 myń teńgege ushyp baryp keldi. Mundai baǵa degen masqara emes pe?! Mysaly Eýropa elderinde stýdentter bir elden ekinshi elge 15-18 dollarǵa qatynaidy. Bizde aviatsiia salasy – eń kóp memlekettik qoldaý alyp otyrǵan sala. Osy loýkoster máselesin kóterip, ásirese kópbalaly analarǵa, jaz mezgilinde týristerge áleýmettik biletterdi engizý boiynsha bólek memlekettik baǵdarlama nemese arnaiy joba retinde daiyndaý máselesin qarastyrýdy suraimyz", - dedi Sarym májilis otyrysynda.
Májilis kýlýarynda jýrnalister kólik ministrinen ushaqpen ushýǵa keibir sanattar úshin áleýmettik bilet engizý bastamasy týraly ne oilaitynyn surady.
"Biz qarastyraiyq. Biraq qazir ol másele talqylanyp otyrǵan joq. Onyń túbi sýbsidiiaǵa kelip tireledi. Al qazir sýbsidiia áýejaidyń ózine, mysaly eki jyl buryn 2,5 mlrd teńge bolsa, qazir 8 milliard teńgege deiin kóbeiip otyr. Sondyqtan bul biýdjetke artyq, qosymsha júk bolady. Al biýdjet, ózderińiz bilesizder, bizdiń salyq tóleýshilerdiń esebinen quralady", - dep jaýap berdi Marat Qarabaev.
