Májilis depýtaty Berik Dúisenbinov Parlamenttiń birlesken otyrysynda «aqjoldyqtardyń» Úkimet pen Esep komitetiniń biýdjet týraly esebin bekitýden nege bas tartqanyn túsindirdi dep habarlaidy QazAqparat.
«Búgingi biýdjettiń oryndalýy týraly baiandamalardy baiqasańyz, kóbi synǵa toly boldy. Biraq biz nege qalys qalyp, qalǵandary nege qoldaǵany ózge partiialaryń óz jumystary shyǵar. Bizdiń ustanym aiqyn. Ulttyq qor bir jylda 55 mlrd dollarǵa kemise, qalai ony qoldaýǵa bolady? Ulttyq qor degen bolashaqtyń nesibesi ǵoi. Biz bolashaqtyń nesibesine qol salyp jatyrmyz. Sondyqtan biýdjettiń bulai oryndalýyn biz qoldai almaimyz», - dedi Májilis ókili.
Depýtat eldegi jekeshelendirý saiasaty men investitsiialyq jobalardyń bir-birine qaishy kelip jatqanyn atady.
«Bir qolymyzben pálen milliardqa meditsinalyq obektiler salyp, ekinshi qolymyzben dál sondai nysandardy óz baǵasynan arzanǵa satyp jatyrmyz. Ony qalai qoldaýǵa bolady? Ekonomikalyq aimaqtar dep otyrmyz. Ol aimaqtar tabys ákelip, jumys oryndaryn ashady, elimizge kól-kósir paida ákeledi dedik. Olardyń qazir ekonomikadaǵy alatyn róli 0,1 paiyz ǵana. Qanshama qarjy quiyldy?! Jeke taraptardan, jeke azamattardan investitsiia tartylǵan joq. Búkil kvazimemlekettik sektor salyp otyr. Mundai kózbaiaýshylyqpen ekonomikalyq aimaq qurý ne úshin kerek?», - dedi Berik Dúisenbinov.
