Depýtat Qarjy monitoringi agenttigin sońǵy úsh aidaǵy valiýtalyq interventsiialar, onyń ishinde shetel valiýtasyn satý jáne satyp alý týraly aqparatty taldaýǵa shaqyrdy, - dep habarlaidy Tengrinews.kz tilshisi.
Májilis depýtaty Amanjan Jamalov Ulttyq bank basshysy Ǵalymjan Pirmatovtyń atyna joldaǵan saýalynda Ulttyq bank erkin naryqtyq baǵamdy jariialai otyryp, belsendi túrde interventsiia júrgizip jatqanyn aitty.
"Ulttyq bank júrgizip otyrǵan erkin qubylmaly mólsherleme eles siiaqty - jurt aityp jatyr, biraq ony eshkim kórmegen. Tutastai alǵanda, 2021 jylǵy qarasha men jeltoqsanda valiýtalyq saýda-sattyq kólemi 3,6 jáne 4,2 milliard dollar boldy. 2022 jylǵy 12-31 qańtar aralyǵynda - 2,5 milliard dollar. Sońǵy 3 aida 10 milliard AQSh dollary. Bul Qazaqstan tarihyndaǵy valiýtalyq saýda-sattyqtyń orasan zor kólemi. Ári basym bóligi Ulttyq banktiń qatysýymen ótken.
Máselen, teńgeniń baǵamyn ustap qalý úshin 2022 jylǵy 12-13 qańtarda Ulttyq banktiń valiýtalyq interventsiia kólemi 240 million AQSh dollary boldy. Bul jalpy saýda-sattyq kóleminiń shamamen 50 paiyzy. Ulttyq bank valiýtalyq interventsiialardy 2021 jylǵy qarasha men jeltoqsanda da júrgizdi - olar boiynsha saldo 500 million AQSh dollaryna jýyq", - dedi Májilis depýtaty Amanjan Jamalov.
Ol 2022 jyldyń qańtaryndaǵy valiýtalyq interventsiialar týraly málimetter áli jariialanbaǵanyna shaǵymdandy.
"Alaida bul tsifrlardyń ózi de tańǵaldyrady. Kólemi boiynsha olardy Densaýlyq saqtaý nemese Bilim jáne ǵylym ministrlikteriniń shyǵyndarymen salystyrýǵa bolady. Kimniń múddesinde interventsiialar júrgizilip, rezervter jumsaldy? Bul importtyq mámilelerdi júrgizý úshin emes, alypsatarlyq suranysty qanaǵattandyrý úshin jasaldy. Qarapaiym sózben aitqanda, aqshasy barlar dollardy Ulttyq bank esebinen "jaqsy baǵam" boiynsha satyp aldy. Ári bul aqsha shetelge shyǵarylǵan siiaqty", - dedi ol.
Onyń aitýynsha, naryqtyń kásibi qatysýshylary da teńge baǵamy nege bailanysty ekenin túsinbeidi.
"Munai baǵasy ósedi nemese tómendeidi, baǵam ózgermeidi nemese múldem basqa jaqqa qozǵalady. Ulttyq bank valiýta naryǵyna aralasady, biraq ózi baǵamnyń qandai nysanaly mánderin qoldaitynyn túsindirmeidi. Ekinshi jaǵynan, erkin qubylmaly baǵam týraly málimdeidi.
Baǵamnyń aldyn ala boljap bilýge bolmaityny oǵan degen senimsizdiktiń basty sebebine ainaldy. Sondyqtan, adamdar únemi devalvatsiiany kútýmen ómir súredi", - dedi ol.
Ulttyq bank Qarjylyq monitoring agenttigimen birlesip, valiýta naryǵyndaǵy alypsatarlyqty toqtatý boiynsha sharalar ázirlep, valiýtany satý men satyp alýdy qosa alǵanda, kún saiynǵy negizde valiýtalyq interventsiialar týraly derekterdiń jariialanýyn qamtamasyz etý qajet dep esepteimin, dedi ol.
