© Sputnik / Abzal Kaliev
Májilis depýtaty Amanjol Áltai Premer-ministrdiń orynbasary Altai Kólginovke sońǵy qońyraý sharasy ótetin kúnge qatysty saýal joldady, dep habarlaidy "Ult aqparat" Azattyq Ruhy portalyna silteme jasap.
«Zulmatty jyldar qasiretin jadymyzda saqtap, sabaq alý úshin 31 mamyr – Asharshylyq jáne saiasi qýǵyn-súrgin qurbandaryn eske alý kúni bolyp belgilendi. Totalitarlyq júieniń qandy qasabyna ilikken milliondaǵan jannyń qasiretti taǵdyryna oilana qarap, aiaýly esimderin ardaqtai eske alyp, shyn kóńilimizben laiyqty qurmet kórsete almai kelemiz», - deidi depýtat.
Amanjol Áltai atap ótkendei, «osy kúni Alash arystarynyń rýhyna jasap júrgen qurmetimiz olardyń eskertkishteri men memorialdyq oryndarǵa gúl shoǵyn qoiý, sol jerlerde birer paraq sóz oqýdan aspai tur».
«Eldiń el bolýy úshin ǵaziz bastaryn báigege tikken arystar men qoldan jasalǵan zulmattyń aranyna jutylǵan jazyqsyz baýyrlarymyzdyń árýaqtary aldynda osyndai sharamen shektelýimiz uiat deýdiń ózi az, bul – eldigimizge syn bolyp turǵan jaǵdai. Oqý-aǵartý ministriniń 2022 jylǵy 12 tamyzdaǵy № 363 buiryǵyna sáikes, orta bilim beretin mektepterdegi sońǵy qońyraý 36 oqý aptasynyń sońy – 31 mamyr bolyp bekitilip otyr. Bul sheshimniń beiit basynda toi jasaǵandai áser etip turǵanyn aitpasaq bolmaidy. Bul ministrlikte osyny ýaqytynda ańǵaryp, der kezinde bul buiryqta ońtaily sheshim usynýǵa túsinigi jetetin bir adamnyń tabylmaǵany ma, shynymen?! Qairan bozdaqtardyń rýhyna bir kúndi de qimai, apyl-ǵupyl aza tutqansyp, ile-shala toi toilap, dýmandatyp kete beretin bolsaq, eldigimiz qaisy?! Adamshylyǵymyz qaisy?!» – deidi ol.
Halyq qalaýlysy osy sebepten mektepterdegi sońǵy qońyraý kúnin 30 mamyrǵa, ne bolmasa 1 maýsymǵa aýystyrý kerek ekenin aitady. Onyń sózinshe, bul – eshqandai talqylaýdy qajet etpeitin ádiletti talap.
«Eń bolmasa, 31 mamyrda áleýmettik jelilerdegi eldiń birligin búldiretin, qoǵamnyń dińgegin shiritetin adamdardy bir-birin qaralaý, ǵaibattaý, jala jabý, ósekteý, qarǵaý sekildi teris ádetterden tyiylýǵa shaqyramyn. 31 mamyr – azattyq úshin arpalysyp ótken, memleket qurý jolynda mert bolǵan, ult úshin atylǵan, urpaq baqyty úshin azap shekken asyl babalar aldyndaǵy paryzymyzdy sezinetin, Alash amanatyna adal bolýǵa qulshynatyn kún. Sonymen birge Asharshylyq jáne saiasi qýǵyn-súrgin qurbandaryn eske alý kúni dep belgilengen 31 mamyrǵa bailanysty Úkimet osy kúnniń mán-mańyzyna, salmaǵyna laiyqty sharalardy iske asyrýǵa tiis dep esepteimin», - dep saýalyn tolyqtyrdy Amanjol Áltai.
Depýtattyń aitýynsha, «Jalpyhalyqtyq únsiz eske alý minýty» sharasy dástúrli ótýi kerek. Sol sátte el boiynsha búkil qozǵalys toqtap, bir minýttyq únsizdik arqyly saiasi qýǵyn-súrgin qurbandary men asharshylyq qurbandaryn eske alý qajet.
Onymen qosa, telearnalarda ázil-qaljyń, shoý baǵdarlamalar, estradalyq kontsertter toqtatylyp, onyń ornyna el tarihyndaǵy qasiretti kúnderdi jas urpaqtyń jetik túsinýine jol ashatyn mazmundy baǵdarlamalar kórsetilýge tiis.
«Aqparat quraldarynda ataýly kúnniń tarihi salmaǵyn, taǵylymdyq maǵynasyn jan-jaqty jetkizetin maqalalar bolýy kerek. Balabaqshalar men mektepterde, joǵarǵy oqý oryndarynda balalar men jastarǵa arnaýly dárister, pikirlesý saǵattary, ziialy qaýym jáne tarihshylarmen kezdesý keshteri ótkizýdi jolǵa qoiý qajet», - deidi ol.
