— Búgin Parlament Májilisinde otandyq munai-gaz salasyn damytýǵa arnalǵan Úkimet saǵatynda depýtat Gleb Shegelskii gaz baǵasynyń qymbattaýyna sebep bolyp otyrǵan negizgi máselelerdi atap ótti. Sondai-aq ol ákimdikter men gaz taratýshy kompaniialardyń qiturqy áreketterin ashyp berdi. Bul týraly inform.kz habarlady.
Depýtattyń sózine qaraǵanda, búginde gaz óndirý kezinde sapaǵa durys kóńil bólinbeidi. Ásirese, shikizatty kúkirtten durys tazalamaǵandyqtan, gaz qubyrlary tez búlinip jatady. Sonyń saldarynan taýarlyq gazdyń baǵasy kóteriledi de, búkil salmaq tutynýshylarǵa túsedi.
«Búginde Qazaqstanda óndiriletin suiytylǵan gazdyń kólemi ishki suranystan tórt ese artyq bolyp tur. Árine, ondai bolǵan jaqsy. Sebebi kógildir otyndy keńinen paidalanýǵa barlyq jaǵdailar bar. Degenmen, onyń keri jaǵy da bar. Búginde ishki suranystan artyq gaz syrtqa satylady. Alaida ol eksport durys baqylanbaidy. Al odan túsetin aqsha biýdjetke emes, gazdy zańsyz tasymaldap jatqandardyń qaltasyn qalyńdatyp otyr», — deidi G.Shegelskii.
Osy oraida xalyq qalaýlysy jergilikti jerde gazdy kóptep alyp, eksportqa zańsyz shyǵarý sxemasyn ashyp berdi. Onyń aitýynsha, búginde oblystardaǵy gazǵa degen suranystyń kólemi ákimdikter men gaz taratýshy kompaniialardyń málimetteri negizinde anyqtalady. Energetika ministrligi soǵan qarap, taýarlyq gazdy berip otyrady. Ákimdikter men gaz taratýshy kompaniialar osy kesteni paidalanyp, tapsyrysty artyǵymen berip jatady.
«Gazdyń artyq kólemi zańsyz ekporttalady. Sebebi kórshi Reseide suiytylǵan gazdyń baǵasy Qazaqtannan tórt esege qymbat bolyp tur», — deidi G.Shegelskii.
