Senat depýtaty Sultan Dúisembinov Qazaqstanda destrýktivti dini aǵymdardyń kóbeiip bara jatqanyna alańdady, dep habarlaidy Sputnik Qazaqstan.
Senator qańtar oqiǵalarynda dini radikaldar men qylmystyq toptar halyqtyń narazylyǵyn syltaý retinde paidalanyp, el tynyshtyǵyn buzǵanyn eske saldy. Aitýynsha, din atyn jamylǵan jat aǵymdardyń músheleri dini saýaty men áleýmettik turmysy tómen jastardy óz qarmaǵyna túsirý úshin olardyń sanasyn ýlap, jat ideologiiasyn taratýmen ainalysqan.
"Jalpy destrýktivti dini aǵymdardyń túpki negizi bar, maqsaty ortaq. Iaǵni halifat qurý, halifatta ómir súrý, elimizdiń konstitýtsiialyq qurylymyn, zańnamasyn, halqymyzdyń mádenietin, salt-dástúri men tilin moiyndamaý. 2019 jyly Qazaqstan dintanýshylarynyń 11-shi forýmynda UQK terrorizmge qarsy ortalyǵynyń ókili "Qazaqstanda destrýktivti dini aǵymdardy ustanýshylar sany 20 myńnan asatynyn málimdedi. Osy tusta olardyń sany nege kóbeiip jatyr degen suraq týady", - deidi Dúisembinov premer-ministrge joldaǵan depýtattyq saýalynda.
Keibir derekterge súiensek, Qazaqstanda dini ekstremizm men terrorizmge qarsy is-qimyl jónindegi 2018-2022 jyldarǵa arnalǵan memlekettik baǵdarlamaǵa biýdjetten 270 milliard teńge bólingen. Alaida onyń tek 4 protsenti ǵana profilaktikalyq sharalarǵa jumsalǵan.
"Bul baǵdarlamanyń nátije bermegenin qaiǵyly qańtar oqiǵasy kórsetip otyr. Áli kúnge deiin jaýapty ókiletti organdar bul máselege qatysty baǵa bermedi", - dedi senator.
Osyǵan orai depýtattar dini ekstremizm men terrorizmge tosqaýyl qoiý úshin birqatar usynys aitty:
- dini ahýaldy tereń zerdelep, dini ekstremizm men terrorizmge qarsy is-qimyl jónindegi jańa memlekettik baǵdarlama daiyndaý;
- óńirler bólinisinde Qazaqstannyń dini ahýaly kartasyn ázirleý;
- din salasy boiynsha monitoring jáne saraptama júrgizetin respýblikalyq zertteý ortalyǵyn qurý jáne ony bilikti mamandarmen jasaqtaý;
- ortalyqtan basqarý jáne úilestirý arqyly tiisti ádistemelik, aqparattyq, qarjylyq qoldaý kórsete otyryp, óńirlerdegi aqparattyq-nasihattyq toptar qyzmetin jetildirý jáne kúsheitý;
- din salasy boiynsha memlekettik uiymdardaǵy dintanýshy, teolog mamandardyń áleýmettik jaǵdaiyn jaqsartý;
- dástúrli dini konfessiia ókilderimen birlesip, dini baǵytta mamandar daiarlaityn ortalyqtar men joǵary oqý oryndarynyń sapasyn arttyrý, bul jumysqa kásibi, azamattyq qoǵam ókilderin tartý;
- QMDB tarapynan imamdardyń bilim deńgeiin arttyryp, sapasyn jaqsartý.
