AMANAT partiiasynyń baspasóz qyzmeti
Májilis depýtaty Erlan Saiyrov energetika ministrinen osy qysta óńirlerde "Ekibastuz apaty" qaitalanbai ma dep surady, dep habarlaidy Sputnik Qazaqstan.
Májilismenniń aitýynsha, áriptesteri jýyrda Temirtaýdaǵy JEO men Qaraǵandydaǵy jylý jelilerin baryp kórip shyqqan. Jumsartyp aitqanda, jaǵdai kóńil kónshitpeidi.
"ArselorMittal Temirtaý" AQ JEO-2-de jylý qazandyqtary tozǵan. 4-shi qazandyqty jóndeý qazan aiynyń sońyna deiin uzartylǵan. 7-shi jańa qazandyqtyń qurylysy kelesi jyldyń sońyna deiin sozylǵan. Temirtaý JEO-da tórt qazandyqtyń jabdyǵy kelmegen, jóndeý jumystary keshiktirilip jatyr. Jylý berý maýsymyna jospardan kesh kirý qaýpi bar. Jylytý maýsymy áli bastalǵan joq, al biz apattarǵa kýá bolyp otyrmyz. Qaraǵandy JEO-3-tegi apat búkil qalany jaryqsyz qaldyrdy", - deidi Saiyrov.
Ol osy qysta halyq jylýsyz qala ma dep alańdaidy.
"Osy qarqynmen qysta "Ekibastuz apaty" qaitalanbai ma? Siz JEO problemasyn saiasilandyrýǵa jol berdińiz, aldaǵy jylý berý maýsymynda jeke jaýapkershiligińizdi sezinesiz be?" dep surady depýtat energetika ministrinen.
Almasadam Sátqaliev jylý berý maýsymy boiynsha úlken jumys atqarylǵanyn atap ótti. Barlyǵy 55 mlrd teńgege jýyq qarajat bólingen, onyń 37,1 mlrd teńgesi jylý-energetika nysandaryna baǵyttalǵan.
"Qaraǵandy energotoraby boiynsha belgili bir problemalar bar. Biz "ArselorMittal Temirtaý" JEO-2-ni problemalyq nysanǵa jatqyzamyz. Tórt qazandyq, eki týrbina jumys istep tur. Tórtinshi qazandyq boiynsha jumys keshigip jatyr, 30 qarashada aiaqtalady dep kútilýde. Jalpy bul jylý júktemesine qatty áser etpeidi. Osy JEO boiynsha jylý berý maýsymy 30 qyrúiekte bastaldy. Tutynýshylardyń 80 paiyzy qosyldy", - dedi Sátqaliev.
Ministr keshigýlerge bailanysty problemalar ministrlik pen jergilikti atqarýshy bilik tarapynan baqylanatynyn atap ótti.
"Iá, jeke jaýapkershiligimdi sezinemin. Barlyq másele boiynsha depýtattar aldynda da, halyq aldynda da jaýap berýge daiynbyz", - dedi vedomstvo basshysy.
