Májilis depýtaty Erlan Smaiylov Eńbek jáne halyqty áleýmettik qorǵaý ministrliginiń saiasatyn synǵa aldy. Ol járdemaqyny eselep kóterýdi talap etti, - dep habarlaidy Tengrinews.kz tilshisi.
"Azyq-túlik ónimderine, qyzmetterge, kommýnaldyq tarifterge baǵanyń turaqty ósýi jáne jalpy ómir súrý qunynyń qymbattaýy jaǵdaiynda múgedek adamdardyń, bala týýǵa bailanysty demalystaǵy analardyń, kópbalaly jáne jas otbasylardyń, zeinetkerlerdiń jáne halyqtyń basqa da toptary arasynan shyqqan milliondaǵan qazaqstandyq úshin memlekettik járdemaqy men zeinetaqynyń artýy ózekti bolyp otyr.
2022 jyldyń 1 qańtarynan bastap eń tómengi jalaqy qazirgi 42 500 teńgeden 60 myń teńgege deiin ósedi, bul - 41 paiyz. Biraq, sonymen qatar, Eńbek jáne halyqty áleýmettik qorǵaý ministrligi múgedektik boiynsha járdemaqyny, bala týýǵa bailanysty járdemaqyny jáne balany bir jasqa deiin kútý boiynsha ai saiynǵy járdemaqyny sáikesinshe arttyrý máselesin kótermeidi. Kópbalaly otbasylarǵa beriletin járdemaqy, eń tómengi zeinetaqy jáne t.b.", - dedi vitse-premer Eraly Toǵjanovqa saýal joldaǵan depýtat.
Ol 2022-2024 jyldarǵa arnalǵan biýdjet jobasynda 2022 jyldyń 1 qańtarynan bastap áleýmettik tólemniń barlyq túrin nebári 5 paiyzǵa arttyrý kózdelgenin túsindirdi. Depýtat bul kórsetkish azyq-túlik, kiim-keshek, qyzmet kórsetý jáne tarifterdiń naqty ósýin aitpaǵanda, infliatsiianyń statistikalyq ósimin de qamtymaitynyn aitty. Aita keteiik, depýtattyń ashýyna qaramastan, búgin Májilis 2022-2024 jyldarǵa arnalǵan respýblikalyq biýdjet jobasyn maquldap, Prezidentke qol qoiýǵa jiberdi.
