Májilistiń jalpy otyrysynda depýtat Andrei Linnik el aýmaǵyndaǵy mektepter men balabaqsha qaýipsizdigin kúsheitýge qatysty usynys aitty. Osy oraida ol Úkimet basshysy Asqar Maminniń atyna depýtattyq saýal joldady, dep habarlaidy "Ult aqparat".
«Qazan qalasynda bolǵan qaiǵyly oqiǵa úrei týdyrǵany anyq. 19 jastaǵy adamnyń qolynan muǵalimder men oqýshylar qurban boldy. Zardap shekkenderdiń týystary men jaqyndaryna qaiǵyryp kóńil aitamyz», - dedi depýtat.
Onyń aitýynsha, mektepterdegi kúzet fýntsiialaryn kóbine zeinet jasyndaǵy vahterler atqaryp keledi.
«Olarmen sypaiy ári senimdi negizde sóilesý ǵimaratqa kedergisiz kirýge jetkilikti bolady. Al eger qastandyq jasaý nietinde kelgen adam bolsa, egde jastaǵy kúzetshi oǵan qandai qarsylyq kórsete alady?», - dedi Andrei Linnik.
Osy oraida ol mektepter men mektepke deiingi mekemeler jáne olardyń aýmaǵyndaǵy jerlerde qaýipsizdik tiisti deńgeide emes ekenin aitty.
«Qazandaǵy jaǵdaiǵa toqtalsaq, mektep aýmaǵyna bóten adam kirgen bolatyn. Biraq basqa elderde osyǵan deiin bolǵan oqiǵalarda áleýmettik jeli men kompiýter oiyndar yqpalymen oqýshylardyń ózderi osyndai qylmysqa baryp jatatynyn kórdik», - dedi depýtat.
Osyǵan bailanysty depýtattyq saýalda birqatar usynystar aityldy.
Birinshiden, oqýshylar syiymdylyǵyna qaramastan, bilim berý nysandarynyń antiterroristik qorǵanys júiesine talaptardy qaita qaraý máselesi kóterildi.
Ekinshiden, qoǵamdyq oryndardy kúzetetin kúzet qyzmetteriniń qyzmetkerlerine qarý ustaýǵa jáne olarǵa múliktik keshendi ǵana emes, sonymen qatar adamdardyń qaýipsizdigin de kúzetýdi júzege asyrý mindetin júkteýge ruqsat berý usynysy aityldy.
Úshinshiden, mektep psihologtarynyń jumysyn kúsheitý kerek ekeni jetkizildi.
Tórtinshiden, atys qarýyn alyp júrý men saqtaýǵa ruqsat berýge qadaǵalaýdy kúsheitý kerektigi aityldy.
Budan buryn habarlanǵandai, 11 mamyrda Qazan qalasyndaǵy mektepte qylmysker oq jaýdyryp, adamdar qurban boldy. Búgin QR Bilim jáne ǵylym ministri Ashat Aimaǵambetov Tatarstannyń Qazan qalasynda bolǵan jaǵdaiǵa bailanysty elimizdegi aǵymdaǵy jaǵdaiǵa taldaý júrgizýdi jáne jaqyn arada balalardyń qaýipsizdigin qamtamasyz etý boiynsha barlyq deńgeilerde qosymsha keshendi sharalar qabyldaýdy tapsyrdy.
«Biz osy qaiǵyly oqiǵalardan sabaq alýymyz kerek. Keshe osy máseleler boiynsha keńes ótkizdim. Aǵymdaǵy jaǵdaiǵa taldaý júrgizýdi jáne jaqyn arada balalardyń qaýipsizdigin qamtamasyz etý boiynsha barlyq deńgeilerde qosymsha keshendi sharalar qabyldaýdy tapsyrdym», dep jazdy ministr.
