Pavlodar qalasynda patshalyq-keńestik kezeńderdiń ideologiiasynan týyndaǵan ataýlardy egemen eldiń onomastika saiasatyna sai ataýlarǵa aýystyrý máselesi oqtyn-oqtyn kóterilýde. Nátije joq emes, bar: Kýibyshev, Sverdlov, Kalinin, Dzerjinskii siiaqty qyzyl komissarlardyń qurmetine qoiylǵan kóshe ataýlarynan arylǵanymyzǵa birshama jyl ótti. Biraq Ertistiń Kereký óńirine esh qatysy joq patshazadanyń, Resei imperiiasynyń qolbasshylary men bolshevikter kóseminiń esim-soilarynan turatyn ataýlardan osy kúnge deiin qutyla almaǵanymyz ashy shyndyq. Jergilikti bilik táýelsiz orystildi jýrnalister men at tóbelindei patshashyl-keńesshil toptyń kárinen seskenip, qol qýsyryp qarap otyr deýge aýyz barmaidy.
Qarasha aiynyń 16-sy kúni «Kolos» mádeni-saýyq ortalyǵynda ákimdik qyzmetkerleri Lenin kóshesin «Astana» dep qaita ataý máselesi boiynsha qoǵamdyq tyńdaý uiymdastyrdy. Jiynǵa qala turǵyndary men qalalyq máslihattyń depýtattary qatysty.
Árine, qarama-qarsy pikirler aityldy, sezim aýanyna berilip sóileýshiler de boi kórsetti. Áitse de, Astana ataýyn qoldaýshylardyń qarasy qalyń ári aitqan ýájderi salmaqty boldy. Osy jaitty eskergen 8 depýtattyń 7-eýi kópshilik sheshimin maquldap daýys berdi. Tek depýtat V. Deimýnd Lenin ataýyn ózgertýge qarsy ekenin málimdedi!
Sonymen, depýtat Viktor Deimýnd nelikten Lenin ataýyn «Astana» dep ózgertýge qarsy boldy? Múmkin bul jerlesimiz KSRO quramynan bólingen ózge respýblikalardy aitpaǵanda, Resei Federatsiiasynyń ózinde Lenin esimi men leninizm ilimine qatysty «Leningrad», «Ýlianovsk», «Oktiabrskaia» , «Sovetskaia», «Kommýnisticheskaia» tárizdi ataýlardyń túgeldei ózgertilgenin bilmeitin shyǵar? Álde egemendik kezeńinde Leninniń ómirbaiany túgil aty-jóninen múlde habary joq tutas bir býynnyń ósip jetilgenin baiqamaǵan bolar? Baiqasa da, Elbasynyń «Rýhani jańǵyrý» baǵdarlamasy basshylyqqa alynǵan qazaqstandyq qoǵamda jas urpaq tárbiesine leninizm ilimin kiriktirýge qajettilik joq ekenin baiyptai almady ma eken? Nemese kelesi 2018 jyly 20 jyldyq mereitoiy atalyp ótiletin Astana qalasynyń Táýelsiz Qazaqstannyń simvoly ekenin, kommýnistik qoǵamnyń kelmeske ketkenine shirek ǵasyrdan astam ýaqyt ótkenin ańǵarmady ma? Kim bilsin, áiteýir, osyndai bir gáp bar siiaqty.
Degenmen, Viktor Deimýndtyń qalalyq máslihattyń depýtattyǵyna ótýine qoldaý kórsetken sailaýshylar arasynan oǵan «Lenin» jáne «Astana» sózderiniń mán-maǵynasyn uǵyndyryp bere alatyn azamattar tabylady degen úmittemin. Al jańa ataýdyń qalalyq máslihattyń aldaǵy sessiiasynda bekitiletinine senimim mol.
Arman QANI,
Pavlodar qalasy.
