Ashpyn. Qoǵamǵa taspyn. Álim quryp, ashtyqtan aiaǵymdy tái– tái basyp, ireleńdep júrip, ómirime riza bolǵandai, ótirik kúlip, májilis depýtattary otyratyn ǵimaratqa kire bergenimde, kezekshi politsiia toqtatty.
–Azamat, neǵyp júrsiz? –dep surady ol.
–Jái ásheiin...
–Shynyńyzdy aityńyz, bolmasa, úiińizge qaityńyz!
–Shyńǵyryp, shynymdy aitsam, jumys izdep júrmin...
–Bul jerden jumys izdemeidi. Degenmen, aita qoiyńyz, qandai jumys izdep júr edińiz?
–Depýtat bolǵym kelip...
Ol meniń kiimime kúle qarady da:
–Bir oryn bos deidi. Biraq sizdi qabyldai qoiar ma eken? –dedi.
–Depýtattardyń ailyǵy million teńgege deiin ósip jatyr deidi. Qyzyǵyp ketkenim...
Onyń maǵan jany ashydy ǵoi deimin, bir bólimge jetektep apardy.
–Depýtat bolǵyńyz keledi me? –dep surady ondaǵy kisi.
–Bolǵanda qandai... Ashpyn... Balalarym nan surap jylaǵanda, mazam qashady. Áielim múgedek...
–Ailyǵy kóp. Aqsha sanai alasyz ba?
–Sanaǵanda qandai!
–Bizde tasadaǵy topastar kóp. Solardyń biri bolyp qalmaisyz ba?
–Topastar?
–Endi... Eleýsiz depýtattardy aitamyn. Ásheiin, kelip–ketip júr. Barynan joǵy jaqsy. Úndemester... Solardyń biriniń orny bos edi. Prezident jarlyǵymen sailaýsyz– aq taǵaiyndalasyz. Ne deisiz?
Kózime móltildep jas keldi... Jyladym. Únsiz. Kóz aldyma aqshalar elestedi. Pyr–pyrlap ushyp júr ainalamda. Iyǵyma, alaqanyma qonady. Balalarym bas salyp, bólke nandy opyryp jep jatyr. Nan. Qairan, qara nan! Nanǵa zar bolyp júrgen otbasylar kóp qoi, bizdiń elde!
Sodan meni úkimetke shaqyryp, Premer–ministr basymnan sipady. Taǵy jyladym. Halyqtyń atynan jyladym. Monshaǵa tegin túsirtip, sý jańa kóstim–shalbar kigizdi. Úkimet shalbary! Taǵy jyladym. Kóz jasym tiylar emes. Qýanyshtan! Ailyǵymdy aitsańshy! Million teńge! Munyń bárin ózim almaimyn! Jartysyn halyqqa, kedeilerge taratyp bermesem... Otyryp alyp, opyryp aqsha tapqan uiat qoi... Sodan men depýtat bolyp kettim! Ash jalańashtar partiiasy atynan. Ministrlermen aitysatyn boldym. «Halyq ash, ne istep jatyrsyńdar?» dep qoiamyn ózimshe. Úkimet múshelerine saýaldar tastaimyn. Sodan bir kúni úndemes depýtattar meni ońasha qorshap aldy.
–Ái, beri kel, sen kimsiń?
–Depýtatpyn.
–Má...
–Bul ne? –dep suradym men.
–Skotch.
–Ony qaitemin?
–Májiliste aýzyńa jabystyryp otyrasyń...
–Ói, ózderińe buiyrsyn! –dep kete berip edim, olar jabyla ketti. Biri tepkilep, biri qylǵyndyryp... Óletin shyǵarmyn?... «Ashtan ólgennen góri depýtattardyń qolynan ólgen abyroi ǵoi!» – dep oilap qoiamyn ishimnen. Bir kezde senat tóraǵasy kele jatyr edi, maǵan jabylyp uryp jatqandar oryndarynan ushyp turdy. Meni qushaqtap, betimnen súiip, týfliimdi jalap... «Jasasyn, úndemes depýtattar!» dep aiqailap jatyp, túsimnen shoshyp oianyp ketkenim! Týý, endi depýtat bolǵanymda... Me... Meniń de depýtat bolǵym keledi, keshirińizder...
Muhtar Sherim,
.jpg)