Májilis depýtaty Syrym Ertaev balalardyń kópqabatty úi terezesinen qulaý jaǵdailary jóninde QR Premer-Ministriniń orynbasary Roman Skliarǵa saýal joldady, dep habarlaidy "Ult aqparat".
Depýtat QR Ulttyq statistika biýrosynyń málimetin keltirip, sońǵy bes jylda Qazaqstanda 140-tan astam bala kópqabatty úidiń terezesinen qulap mert bolǵanyn aitty. Tek osy jyldyń 1-shi toqsanynda ǵana 9 jaǵdai tirkelgen, onyń 1-i qazamen aiaqtalǵan.
«Ótken jyly Nur-Sultan qalasynda 2016 jyly týǵan bala úlkenderdiń qaraýynsyz qalyp, besinshi qabattaǵy páter terezesinen qulap, sol jerde qaitys boldy. Ekinshi jaǵdai Tarazda, 7-shaǵynaýdanda bolǵan. Qaraýsyz qalǵan 2018 jyly týǵan bala bes qabatty turǵyn úidiń tórtinshi qabatynyń terezesinen qulap, aýyr jaraqat alǵan», - dedi S. Ertaev Májilistiń jalpy otyrysynda.
Onyń aitýynsha, kóptegen elderdiń zańnamasynda balalar ornalastyrylatyn ǵimarattyń terezelerine shektegishter qoiý mindeti bekitilgen. Olarǵa aýrýhana, mektep jáne balabaqshalar jatady. Basqa elderde terezeler óndirisinde mindetti túrde shektegishterdi ornatý qarastyrylǵan.
«Bizde, Qurylys jáne turǵyn úi-kommýnaldyq sharýashylyq isteri komiteti tóraǵasynyń buiryǵymen turǵyn úi terezelerinen balalardyń qulap ketpeýi úshin qaýipsizdik qulyptaryn ornatý boiynsha mindetti talaptar engizilgen. Biraq, bul ereje 2018 jyldan bastap paidalanýǵa berilgen jańa ǵimarattarǵa ǵana qatysty. Bul rette, buryn salynǵan ǵimarattarǵa osy standarttyń talaptary esh sáikes kelmeidi. Tipten qazir berilip jatqan jańa úilerde de bul talaptar oryndalmaýda. Sondyqtan balalardyń qaýipsizdigin qamtamasyz etý úshin tiisti sharalardy qabyldaýyńyzdy suraimyn», - dedi Syrym Ertaev.
