Áleýmettik jelide Parlament Májilisiniń depýtaty, zańger Baqytjan Bazarbek kazinoda otyrǵan sýret tarady. Bul foto qoǵamda qyzý talqyǵa ushyrady. Keibireýler qoǵamda orny bar adamnyń mundai jerde júrýin quptamaǵan, - dep habarlaidy Tengrinews.kz saity.
Óz kezeginde depýtat Facebook-paraqshasynda osy sýretke qatysty pikir bildirdi.
"Kazinodaǵy sýretterime qatysty! Obektivti aqparatqa senýge jáne jalǵan aqparatqa berilmeýge keńes beremin. Bul sýret 7 ai buryn, Májilis depýtaty etip sailaǵanǵa deiin, dálirek aitsaq, 2022 jylǵy 24 jeltoqsanda Qonaev qalasynda kazinoda túsirildi, onda jubaiym ekeýmiz bir tanymal pop-toptyń kontsertine keldik. Sýrettegi fonda shyrsha turǵanyn baiqasańyz, meniń ústimde de qysqy jempir. Dostar, men - oiynshy emespin, eshqashan kazinoda oinaǵan emespin jáne muny men baqylap turǵan nemese jubaiymmen táttimen shai iship otyrǵan sýretterden kórýge bolady", - deidi ol.
Onyń sózinshe, munyń bári onyń depýtat retinde jumysyna kedergi keltirý maqsatynda jasalǵan.
"Parlament Májilisine deiin men kásibi kommertsiialyq jer zańgeri boldym, ómirimde eshqashan memlekettik qyzmette jumys istemedim jáne kommertsiialyq zańger retinde ýaqytymdy qalai jáne qaida ótkizgenim jeke isim dep sanaimyn. Meniń oiymsha, buǵan bári kelisedi. Biraq meniń Parlament Májilisindegi belsendi áreketterimnen keiin 7 aidan soń bireýdiń osy jeke sýretterdi (olar jasyryn túrde sýretke túsirilgen) jariialaýy kezdeisoq emes jáne onyń ózindik sebepteri bar. Keiingi ýaqytta Májilis tribýnasynan elimizdegi jer qatynastaryna qatysty jáne qurylystyń eń kúrdeli máselelerin kóterdim! 8 oblys ákimdiginiń jeke turǵyn úi qurylysyna injenerlik jelilerdi júrgizýge bólingen 26 milliard teńgeni igermeý jáne maqsatsyz paidalaný máselesin kóterdim. Parlament tribýnasynda Úkimetten memlekettik jer kadastryn ashyp, barlyq jer ieleri men jer paidalanýshylardyń esimderin jariialaýdy talap ettim. Úkimettiń qarsylyǵyna qaramastan, bul usynysty zańsyz shyǵarylǵan aktivterdi qaitarý týraly zań jobalaryna jáne jaiylym máseleleri boiynsha engizdim. ...Osy usynystardyń barlyǵy ákimdikterdiń uiatsyz sheneýnikteri qurastyrǵan qurylys salýshylar úshin jer bólý jónindegi kópjyldyq sybailas jemqorlyq tájiribesi men shemalaryn buzady. Meniń depýtat retinde kazinoda bolǵanym týraly jalǵan aqparatty taratýshylardyń basty kózdegen maqsaty - halyq aldynda bedelimdi túsirý, meni qaralaý jáne osylaisha jer qatynastaryndaǵy sybailas jemqorlyqqa qarsy kúsh-jigerimdi azaitý. Maǵan aqparattyq qysym jasaý arqyly olar bul usynystardy zań jobalary retinde júzege asyrýǵa kedergi keltirýge tyrysady. Bul - taza arandatýshylyq, meniń depýtattyq qyzmetime jasyryn túrde kedergi. Munyń artynda kim turǵany belgili. Bul kimge tiimdi ekenin boljaýǵa bolady", - dep jazdy ol.
Sondai-aq, Baqytjan Bazarbek lýdomaniiaǵa qarsy kúreste aldyńǵy shepten kórinetinin aitty.
"Oiyn biznesine keletin bolsaq, tolyq tyiym salynýyn jaqtaimyn, bul týraly Parlament Májilisiniń jumys toptarynda aittym, bul týraly taǵy da osynda jazamyn! Qumar oiyn biznesine tyiym salýǵa birinshi bolyp daýys beremin, petitsiiaǵa birinshi qol qoiamyn, birinshi bolyp lýdomaniiamen kúresemin. Meniń áriptesim, depýtat Rýslan Berdenov naqty ustanymymdy biledi. Biraq qaitalaimyn, oiyn biznesimen kúresý ońai emes, óitkeni bul biznes oligarhtar men platformalardyń qolynda ári ishinara shetelde ornalasqan. Aiyptaýlarǵa keletin bolsaq, maǵan qarsy aqparattyq kompaniia iske qosyldy jáne bul arandatýshylyq dep sanaimyn. Mundai qýlyqtar men arandatýshylyqtarǵa berilmeimin. Múmkindigimiz úlken, erik-jigerimiz jetkilikti. Barlyǵy endi bastalady", - dep túiindedi ol.
