Májilistiń jalpy otyrysynda depýtat Merýert Qazbekova memlekettik qyzmetshilerdi qyzmettik baspanamen qamtamasyz etýdiń qatań kriteriilerin bekitýdi surady, dep habarlaidy Sputnik Qazaqstan tilshisi.
Májilistiń jalpy otyrysynda depýtat Merýert Qazbekova premer-ministr Baqytjan Saǵyntaevqa depýtattyq saýal joldady. "Aqjol" fraktsiiasynyń múshesi arany ashylǵan sheneýnikterdiń salyq tóleýshilerdiń aqshasyna qyzmettik baspana satyp alý máselesin kóterdi. Onyń aitýynsha, ákimdikterdi aitpaǵanda, jergilikti jerlerde "kishigirim" bastyqtar, kolledj nemese oblystyq filarmoniia direktoryna deiin qymbat djip pen sedan minedi.
"Biyl memleket esebinen qymbat páter alǵandar týraly aqparat birinen soń biri shyǵyp jatyr. Bir apta buryn ǵana Pavlodarda aýmaǵy 230 sharshy metr, quny 50 million teńgeni quraityn qyzmettik páterge qatysty daý týǵan edi. Sondai-aq, jalpy quny 226 million teńgeni quraityn bes páter satyp alynǵan. Bul alǵash tirkelip otyrǵan fakti emes, "aisbergtiń shyńy" ǵana", — dedi depýtat.
Qazbekova Qazaqstan qalalary men aýdandarynda qazynanyń aqshasyna satyp alynǵan qyzmettik páterlerdi mysalǵa keltirdi. Máselen, onyń aitýynsha, biyl qyrkúiekte Atyraý qalasynyń ákimdigi 58 million teńgege jihazymen qosa 5 bólmeli turǵyn úi satyp alǵan. Al Óskemedende eki elitalyq turǵyn úi nysanyna 82 milllion teńge jumsaldy.
Sonymen qatar, Shymkenttiń turǵyn úi jáne turǵyn úi inspektsiiasy basqarmasy "sýper" jaily 5 qyzmettik páter satyp alý týraly habarlandyrý bergen. Ár páterge 43 million teńgeden bólinip otyr. Kókshetaýda ákimdik 40 million teńgege aýmaǵy 145 sharshy metr 4 bólmeli páter satyp aldy.
"Al Batys Qazaqstan oblysynyń Aqsai qalasynda aýdan ákiminiń záýlim saraiyn jóndeýge biýdjetten 24 million teńge bólingen. Almaty oblysy Jambyl aýdanynyń ákimi keń parkingi bar, aýmaǵy 180 sharshy metr baspanany 35 million teńgege satyp alýdy josparlaǵan. Al jýrnalisterdiń aqparatynsha, sol Uzynaǵashtaǵy eń qymbat kottedj 20 million teńgeden aspaidy", — deidi depýtat.
Qazbekova bul tek BAQ pen qoǵamǵa ǵana belgili faktiler ekenin atap ótti.
"Qazaqstannyń barlyq qalasy men aýdanynda mundai derekterdiń qansha ekenin tek boljaýǵa bolady", — deidi ol.
Májilismenniń aitýynsha, myńdaǵan qarapaiym azamat ipotekasyn ýaqytynda tóleý úshin kún-tún demei eńbektenip, kóp nárseden bas tartyp jatqanda, ysyrapshyldyq pen astamshylyqqa jol bergen sheneýnikterdiń synǵa iligýi oryndy.
"Aqjol" fraktsiiasy memlekettiń aqshasyna sheneýnikterge qyzmettik baspana áperýdi baǵa parametrlerimen jáne baspana aýmaǵymen retteý kerek dep sanaidy. Máselen, "7-20-25" baǵdarlamasy boiynsha dál sol Pavlodarda baspananyń eń joǵary baǵasy 15 million teńge bolyp bekitilgen. Al ákimdik páterdi ózine úsh ese qymbat baǵaǵa satyp aldy", — dedi depýtat.
Osy oraida Qazbekova premer-ministrden memlekettik organdar men biýdjettik uiymdarda tekseris júrgizýdi surady.
"Tekseris qorytyndysynan parlament pen qoǵam da habardar etilsin. Sondai-aq, zań men etika talaptary saqtalmaǵan faktiler anyqtalsa, kinálilerdi jazaǵa tartý kerek. Memlekettik qyzmetshilerdi qyzmettik baspanamen qamtamasyz etýdiń qatań kriteriilerin bekitý kerek. Máselen, "7-20-25" baǵdarlamasynyń parametrlerin negizge ala otyryp nemese ár otbasy múshesin turǵyn úi aýmaǵymen qamtý standarttaryn eskerip", — dedi ol.
