Árbir qazaqstandyqta emhanany ózi tańdaý múmkindigi bar. Bul týraly Densaýlyq saqtaý salasy biýdjetiniń ashyqtyǵyna júrgizilgen monitoring nátijelerine qatysty ótken «Antikor.Live» baǵdarlamasynda aityldy, dep habarlaidy QazAqparat.
«Bizdiń elimizdegi ár aimaq ártúrli sipattamasy boiynsha erekshelenedi. Meditsinalyq qyzmetterge ortasha meditsinalyq shyǵyndar ártúrli. Mysaly, Almaty oblysynda bir adamǵa shamamen 45 myń teńge, al elorda turǵynyna 159 myń teńge jumsalady. Bul 2018 jylǵy málimetter boiynsha kórsetkish», - deidi Ekonomika jáne densaýlyq saqtaýdy qarjylandyrý máseleleri jónindegi sarapshy jáne konsýltant Marat Mamaev.
Onyń aitýynsha, mundai jaǵdaidyń basty sebebi - búkil infraqurylym elordada ornalasqan.
«Adam meditsinalyq kómek alý úshin Nur-Sultanǵa barady. Iaǵni aqsha osynda quiylady, óitkeni elordada kóptegen ulttyq ortalyqtar, ǵylymi institýttar, respýblikalyq klinikalar jáne basqalary shoǵyrlanǵan. Másele mynada: elimizdegi turǵyndardyń shyǵys mólsheri biryńǵai, birkelki emes. Bul úlken másele, ony bir jónge keltirý kerek. Ol ońai jumys emes, sebebi ár adamda emhanany tańdaý múmkindigi bar. Mysaly, Almaty oblysynan kelgen adam astanada emdelgisi kelse, oǵan eshqandai kedergi bolmaýy kerek. Bul jerde másele basqada: Almaty oblysynyń turǵyny meditsinalyq kómekti ne sebepti sol jaqta júrip ala almaityǵynda», - deidi ol.
