AQSh-ta densaýlyq saqtaý ministrliginiń burynǵy keńesshisi Rik Brait Kongreste jaýap berdi. Ol Kongreske shaǵym túsirip, biliktiń koronavirýspen kúres boiynsha áreketin synaǵannan keiin qyzmetinen qýylǵan.
"Amerika daýysy" saitynyń jazýynsha, zań shyǵarý organ ókilderi sarapshydan federaldyq úkimettiń koronavirýs indetimen kúres sharalary týraly suraǵan. AQSh-ta koronavirýstan 86 myńnan astam adam qaitys bolǵan.
Suraqtarǵa jaýap bergen Brait kúzde koronavirýs indeti qaita órshýi múmkin ekenin aityp, Amerikanyń densaýlyq saqtaý salasyna teńdessiz salmaq túsýi yqtimal dep topshylady. AQSh-tyń epidemiiamen kúres sharalaryna toqtalǵan maman "biliktiń budan da ónimdirek jumys isteýine bolar edi" dedi.
"Eger jospardy qaita pysyqtap qaramasa, 2020 jyldyń qys ailary qazirgi zaman tarihyndaǵy eń bir aýyr kezeńderdiń biri retinde este qalmaq" dedi Brait.
Sarapshynyń oiynsha, AQSh-qa koronavirýsty anyqtaityn testileýdiń jalpyulttyq strategiiasy qajet. Onyń sózine qaraǵanda maman qańtar aiynda densaýlyq saqtaý ministrligine koronavirýs juqqan naýqastardy emdep jatqan dárigerlerge qorǵanysh zattar jetispeitinin aityp eskertken.
"Maska, respiratorlar jáne ózge de qajetti zattardy óndirý kólemin kóbeitý qajettigin aittym... Olar meniń aitqandarymdy elegen joq, esesine koronavirýs taqyryby boiynsha joǵary deńgeidegi jinalystarǵa shaqyrýdy qoidy" dedi sarapshy.
Sarapshy koronavirýsqa qarsy vaktsina jarty jyl men 1,5 jyl aralyǵynda daiyn bolady degen boljamǵa kúmán keltirdi. Onyń aitýynsha, bul ýaqyt aralyǵynda AQSh preparattyń qaýipsizdigine kóz jetkize almaidy.
AQSh álemde koronavirýs juqtyrǵandar sany boiynsha alda tur. Munda 1,5 millionǵa jýyq adamnan koronavirýs tabylǵan. 86 myńnan astam adam qaitys bolǵan.
