Qazaqstan Densaýlyq saqtaý ministrliginiń Dári-dármek saiasaty departamenti Qaraǵandy farmatsevtikalyq kesheninde "Spýtnik Lait" vaktsinasynyń óndirisi nege keshigip jatqanyn túsindirdi, - dep habarlaidy Tengrinews.kz.
"Qazirgi tańda "Qaraǵandy farmatsevtikalyq kesheni" JShS "Spýtnik Lait" vaktsinasyn shyǵarýǵa daiyn. Alaida Resei Federatsiiasynan zat jetkizilmegendikten "Qaraǵandy farmatsevtikalyq kesheni" JShS alańynda "Spýtnik Lait" vaktsinasynyń óndirisi bastalmady", - delingen resmi jaýapta.
Vedomstvoda buǵan deiin epidemiologiialyq jaǵdaiǵa bailanysty "Qaraǵandy farmatsevtikalyq kesheni" JShS Densaýlyq saqtaý ministrligine "Spýtnik Laittyń" 150 000 dozasyn tegin bergenin atap ótti. Biylǵy jyldyń 19 qańtarynan bastap 150 myń doza respýblika óńirlerine jóneltilip, revaktsinatsiia úshin paidalanyldy.
