Densaýlyq saqtaý vitse-ministri - QR Memlekettik bas sanitar dárigeri Erlan Qiiasov Ortalyq sailaý komissiiasynyń otyrysynda sailaý kezinde koronavirýs infektsiiasynyń taralýynyń aldyn alý jáne sanitarlyq-epidemiologiialyq qaýipsizdikti qamtamasyz etý jáne azamattardyń densaýlyǵyn qorǵaý algoritmi jaily aitty, dep habarlaidy "Ult aqparat".
- Árbir sailaý ýchaskesiniń kireberisinde meditsina qyzmetkerleri nemese volonter kezekshilikpen termometr arqyly kelgen azamattardyń temperatýrasyn ólsheýi kerek;
- qoldy dezinfektsiialaýǵa arnalǵan sanitaizer bolýy tiis;
- sailaýshylardyń qozǵalys baǵyty boiynsha araqashyqtyq belgiler men nusqaýlyq bolýy tiis;
- paidalanylǵan jeke qorǵanys quraldaryn tastaýǵa arnalǵan konteinerler;
- dene qyzýy kóterilgen (37ºS-tan joǵary) jaǵdaida adamdardy oqshaýlaýǵa arnalǵan jeke oryn bolýy qajet.
Sailaý komissiialarynyń qyzmetin uiymdastyrý kezinde komissiia músheleri árbir 3 saǵat saiyn maskany aýystyrýy tiis, ishke kirgende qoldy tazalaý, al qol alysýǵa jáne kelýshilermen jaqyn bailanysýǵa bolmaidy, sailaý komissiiasy nysanyn ylǵaldy tazalap, jihaz ben tehnikalyq jabdyqty bir-birinen keminde 1,5-2 metr qashyqtyqta ornalastyrý qajet.
Budan basqa, sailaý biýlletenderin taratqanda tikelei bailanys ornatýǵa bolmaidy.
«Sailaýshylar jeke basyn kýálandyratyn qujatty sailaý komissiiasynyń múshesine kórsetedi, biraq qolyna berilmeidi», - dedi Qiiasov.
Epidemiologiialyq jaǵdaidy baǵalaý matritsasyna sáikes 2020 jylǵy 25 jeltoqsannan bastap 2021 jylǵy 5 qańtarǵa deiin joǵary jáne ortasha qaýipti aimaqtarda (qyzyl jáne sary aimaqtarda) bolatyn óńirlerdegi sailaý komissiiasynyń músheleri PTR ádisimen COVID-19-ǵa zerthanalyq tekserýden aldyn ala ótýi tiis.
PTR ádisimen COVID-19 testin sailaý bastalǵanǵa deiin 5 kún buryn tapsyrý qajet.
«Oqshaýlanǵan nemese karantinde otyrǵan sailaý komissiiasynyń músheleri men ózge de sailaý protsesine qatysýshylarǵa sailaý ýchaskesine kirýge ruqsat joq», - dep tolyqtyrdy bas sanitar dáriger.
Nysannan tys jerde daýys berýge ótinish qabyldaǵan kezde, sailaýshydan COVID-19-ǵa bailanysty ózin-ózi oqshaýlaýda otyrǵan joq pa, sony anyqtaý qajet.
Mekemelerdi aralap júrip daýys jinaityn sailaý komissiiasynyń músheleri jeke qorǵanys quraldarymen qamtamasyz etilýi tiis.
Jeke qorǵanys quraldaryn qaita paidalanýǵa bolmaidy. Kórsetilgen jeke qorǵanys quraldary tyǵyz jabylatyn konteinerge nemese odan ári kádege jaratý úshin bakqa salynýy tiis.
Sailaýshylarǵa qajet bolǵan jaǵdaida jeke qorǵanys quraldary beriledi. Jáshikti sailaýshyǵa deiin nemese odan keiin dezinfektsiialaý qajet.
«Ýchaskelik komissiianyń daýys berý qorytyndylary týraly hattamalaryn qabyldaý kezinde qaýipsizdik sharalaryn qatań saqtaý qajet. Daýys berýge arnalǵan statsionarlyq jáne tasymaldanatyn jáshikterdi ashý aldynda olardy dezinfektsiialaý quralymen sanitariialyq óńdeý qajet. Baqylaýshylar, senim bildirgen adamdar sailaý ýchaskesinde maskalyq rejimdi saqtaýy tiis. Epidemiologiialyq jaǵdaidy baǵalaý matritsasyna sáikes 2020 jylǵy 25 jeltoqsannan bastap qyzyl jáne sary aimaqtarda ornalasqan óńirlerdegi baqylaýshylar, senimdi adamdar aldyn ala PTR ádisimen COVID-19-ǵa zerthanalyq tekserýden ótýi tiis. PTR ádisimen COVID-19 testin sailaý bastalǵanǵa deiin 5 kún buryn tapsyrý qajet. Baqylaýshylar men buqaralyq aqparat quraldary ókilderiniń ornalasqan jerleri áleýmettik araqashyqtyqty eskere otyryp, keminde 1,5 – 2 metr ornalasýy tiis. Daýys berý barysyn, daýysty sanaý rásimderin aiqyn kórýge múmkindik bolady», - dedi Qiiasov.
Sailaýshylar sailaý ýchaskesine barǵanda meditsinalyq maska jáne antiseptikalyq suiyqtyq qoldanýy kerek.
Biýlletendi alǵan kezde komissiia músheleriniń qolyna bermeidi, jeke basyn kýálandyratyn qujatty ashyp kórsetýi kerek.
Daýys berýge óz qalamyńyzdy ala kelińiz, bolmaǵan jaǵdaida sailaý komissiiasy bergen qalamdy paidalanyńyz. Bala ertip kelýge bolmaidy.
Úide emdelýine bailanysty oqshaýlaý rejimindegi nemese koronavirýs infektsiiasyna bailanysty karantinde otyrǵan daýys berýge qatysýshylar sailaý ýchaskesinen tys jerde daýys berý týraly ótinish bildirgen jaǵdaida sailaý komissiiasynyń múshesine habarlaýy tiis.
