QR Densaýlyq saqtaý ministrligi 24 aqpan kúni Scat áýe kompaniiasynyń ushaǵymen Tokiodan ushyp kelip, 14 kúnge karantinge jatqyzylǵan jolaýshylardan keshirim surady, dep habarlaidy "Ult aqparat" vedomstvonyń áleýmettik jelidegi paraqshasyna silteme jasap.
«Mundai tótenshe sanitarlyq-karantin sharasy koronavirýs infektsiiasynyń órshýine bailanysty azamattardyń qaýipsizdigin qamtamasyz etý maqsatynda qabyldandy. Atalǵan infektsiia búginde qoǵam densaýlyǵyna qater tóndirip otyr. Aita ketý kerek, bul sheshim barlyq talaptarǵa sai, qysqa merzim ishinde qabyldandy», - dep jazady ministrlik.
Qazirgi tańda barlyq jolaýshylar táýlik boiy dárigerlerdiń baqylaýyndaǵy meditsinalyq mekemede jatyr. Ol Nur-Sultan qalasynan 7 shaqyrym qashyqtyqta ornalasqan.
Olardan synama alynyp, Almatydaǵy Aiqymbaev atyndaǵy qaýipti infektsiialardy zertteitin Ulttyq ǵylymi ortalyqqa jóneltilgen.
Eske sala keteiik, keshe japondyq Diamond Princess laineriniń bortynda bolǵan Qazaqstannyń 4 azamaty Qazaqstanǵa oralyp, Nur-Sultan qalasy №3 kópbeiindi aýrýhanasynyń janyndaǵy infektsiiaǵa qarsy korpýsqa jaiǵasqan bolatyn.
Densaýlyq saqtaý ministrligine qarasty taýarlar men qyzmetterdiń sapasy men qaýipsizdigin baqylaý komiteti Qazaqstanda koronavirýs infektsiiasyn juqtyrǵan adam tirkelmegenin habarlaidy. Qosymsha aqparat qajet bolǵan jaǵdaida táýlik boiy qyzmet etetin 1406 bailanys ortalyǵyna habarlasýǵa bolady.
