Foto: Pexels.com
Ortalyq kommýnikatsiialar qyzmetinde ótken brifingte QR Densaýlyq saqtaý vitse-ministri Erjan Nurlybaev habarlaǵandai, Densaýlyq saqtaý ministrligi dárilik zattardyń qunyn tómendetý, tirkeý rásimderin jeńildetý, sondai-aq dárilerdi jekelendirilgen josparlaý men esepke alýdy engizýge baǵyttalǵan keshendi sharalar ázirledi, dep habarlaidy Ult.kz.
«Dárilik zattardyń shekti baǵasyn belgileý modeli ózgertildi. Buryn shekti baǵalarǵa engizilgen, negizsiz dep tanylǵan keibir ústemeaqylar alyp tastaldy. 1 shildege deiin Qazaqstan Respýblikasynyń aýmaǵynda tirkelgen barlyq dári-dármekter boiynsha qaita esepteý júrgiziledi.
Qazirgi tańda farmatsevtikalyq qoǵamdastyqpen kórsetilgen modeldi synaqtan ótkizý boiynsha belsendi jumys júrgizilýde. Biz TMKKK jáne MÁMS sheńberindegi dári-dármektiń baǵasy shamamen 19%-ǵa, al kóterme-bólshek saýdadaǵy baǵa shamamen 30%-ǵa tómendeidi dep kútýdemiz», – dedi Erjan Nurlybaev.
Shekti baǵany retteý tetigi qaita qaralǵannan keiin dári-dármektiń baǵasy halyq úshin tegin tizbede de (emhanalar men statsionarlar arqyly), bólshek dárihanalarda da barynsha qoljetimdi bolmaq.
Jańartylǵan preparattar tizbesi:
• 3475 dárilik zattyń ataýy
• 2917 meditsinalyq buiym (TMKKK jáne MÁMS sheńberinde)
• 5936 ataý — kóterme jáne bólshek saýda úshin
Baǵany tómendetýdiń ortasha kórsetkishteri:
• 2222 dári-dármek ataýy — 18%-ǵa deiin
• 1847 meditsinalyq buiym — 14%-ǵa deiin
• 5492 dári ataýy (dárihanalarda) — 30%-ǵa deiin
2024 jyldyń qorytyndysy boiynsha:
• 3+ mln azamat ambýlatoriialyq deńgeide tegin dári-dármekpen qamtyldy
• TMKKK (48 nozologiia) jáne MÁMS (70 nozologiia) — 118 nozologiia boiynsha
• 246,29 mlrd teńge bólindi
Ortalyqtandyrylǵan satyp alý nátijeleri:
• 1 593 ataý boiynsha dári-dármek pen meditsinalyq buiym satyp alyndy
• Aýrýlardyń keń taralǵan túrleri qamtyldy: júrek-qan tamyrlary, onkologiia, diabet jáne t.b.
Memlekettik satyp alýdy ortalyqtandyrýdyń nátijesi:
• 50 mlrd teńge únemdeldi
• Qarajat qosymsha kólemge, jańa tehnikaǵa, qyzmet sapasyn arttyrýǵa baǵyttalady
Qazaqstandyq óndirýshiler úlesi:
• Jalpy kólemniń 30%
• Vaktsinalar men orfandyq preparattardy eseptemegende — 37%
“Biryńǵai tereze” qaǵidaty boiynsha tirkeýdiń pilottyq jobasy
Vitse-ministr “biryńǵai tereze” qaǵidaty boiynsha dárilik zattar men meditsinalyq buiymdardy tirkeýdiń pilottyq jobasy týraly aitty. Pilot 2025 jylǵy 1 shildege deiin jalǵasady. Eger tiimdiligi dáleldense, turaqty modelge kóshý josparlanýda.
«Tsifrlandyrý ministrligimen birlesip kompozittik qyzmetterdi pilottaý júrgizilýde. Kompozittik qyzmettiń sheńberinde ishki tirkeý rásimderin ońtailandyrýdy kózdeitin norma iske asyrylady. Dárilik preparattardy tirkeý 100 jumys kúni ishinde júrgiziletin bolady», – dedi Erjan Nurlybaev.
Qyzmet qoldanystaǵy saraptama, tirkeý jáne baǵa belgileý mehanizmderimen qatar júzege asyrylady. Sonymen qatar, preparattardy Qazaqstan ulttyq dárilik formýliaryna engizý úshin kásibi saraptama da kózdelgen.
Tsifrlyq tańbalaý jáne baqylaý júiesi
Barlyq naryq qatysýshylary tsifrlyq tańbalaý jáne baqylaý júiesine tolyqtai qosyldy.
Júie iske qosylǵaly:
• 366 mln qaptama tańbalandy
• 80 mln-nan astamy ainalymnan shyǵaryldy
Qamtylǵandar:
• 19 otandyq óndirýshi
• 272 kóterme saýda kompaniiasy
• 8000+ bólshek saýda kompaniiasy
• 1900+ meditsina uiymy
Tańbalaý árbir qaptamanyń qozǵalysyn baqylaýǵa múmkindik beredi, kontrafaktige tosqaýyl qoiyp, tutynýshy senimin arttyrady.
