QR Densaýlyq saqtaý ministrliginiń Farmatsiia komiteti resmi saýalǵa orai QR Parlamenti Májilisiniń depýtaty Záýresh Amanjolovanyń dárihanalardaǵy dári baǵasynyń qymbattyǵyna qatysty synyna jaýap berdi.
«Qazirgi ýaqytta QR Densaýlyq saqtaý ministrligi búkil dárilerdiń baǵasyn retteý úshin farmatsevtika qoǵamdastyǵynyń ókilderimen birge barlyq dárilik zattardyń shekti baǵasyn qalyptastyrý ádistemesin talqylaý jumysyn júrgizýde. Ministrlik barlyq dárilik zattardyń baǵasyn retteýge bailanysty óziniń quzireti sheginde «Halyq densaýlyǵy jáne densaýlyq júiesi týraly» QR Kodeksi men Kásipkerlik kodeksine sáikesinshe ózgerister engizý máselesin qarastyrýda. Normativtik-quqyqtyq baza ázirlenip, qabyldanǵannan keiin barlyq dárilik zattardyń baǵasyn retteý júzege asyrylatyn bolady», - dedi ministrlikten QazAqparatqa.
Sonymen birge vedomstvo mindetti áleýmettik meditsinalyq saqtandyrý aiasynda elektrondy retsent engizýdi josparlap otyr, dárilik zattardyń sipattasy men baǵasy kórsetilgen biryńǵai anyqtama engizý boiynsha aqparattyq resýrs ázirlenýde. Munan bólek, 2016-2019 jyldarǵa arnalǵan «Densaýlyq» densaýlyq saqtaýdy damytýdyń memlekettik baǵdarlamasyn júzege asyrý is-sharalarynyń josparyna dári-dármekti satýda qatysýshy barlyq taraptyń joǵary jaýapkershiligi jónindegi ádep normasyn engizý kózdelip otyr. Bul meditsinalyq qyzmetkerlermen qatar óndirýshilerdiń de is-áreketin reglamentteýge múmkindik beredi. «Ministrlik tarapynan dárilik zattardy, meditsinalyq maqsattaǵy buiymdardy jáne meditsinalyq tehnikalardy satýdyń ádebi tetikterin ázirleý boiynsha usynystar daiyndaityn jumys toby bekitildi», - delingen komitettiń aqparatynda.
Ministrliktiń aqparatyna sáikes, dárilik zattardyń, meditsinalyq maqsattaǵy buiymdardyń jáne meditsinalyq tehnikalardyń ainalymy salasyndaǵy memlekettik baqylaýdy QR DSM Farmatsiia komiteti men onyń elimizdiń barlyq 16 óńirinde ornalasqan aýmaqtyq bólimsheleri júzege asyrady. Qazirgi ýaqytta 12 myńnan astam farmatsevtikalyq qyzmettiń nysany memlekettik baqylaýǵa alynǵan. Atalǵan nysandardyń 94 paiyzy jekemenshik. Onyń 76 paiyzy shaǵyn kásipkerlik sýbektisi sanalady. Al onyń basym bóligin dárihanalar qurap otyr. Elimizde búginde 8 myńnan astam dárihana bar.
Esterińizge sala ketsek, Májilistiń jalpy otyrysynda depýtat Záýresh Amanjolova QR Densalyq saqtaý ministrligine saýal qoiǵan bolatyn. Onyń aitýynsha, dárihanalarda retseptilik dári-dármekter esh baqylaýsyz beriledi.
«Kóbinese adamdar dárihanaǵa keledi de, aýrý belgilerin aityp, qandai dári ishýge bolatynyn suraidy. Al dárihana qyzmetkeriniń qymbat dárini usynatyndyǵy sózsiz. Sonymen birge, kei jaǵdaida, patsientter naýqasy jaily internetten oqyp alyp, sonda kórsetilgen dárilerdi satyp alady, sebebi olarǵa qoljetimdi. Iaǵni, medikamentter dárigerdiń nusqaýymen emes, aqyl-keńes boiynsha ótkizilip jatyr», - deidi ol.
Osyǵan bailanysty depýtat dári-dármekterdi satýdyń ádep jáne kásibi normalaryn, dári-dármektiń óndirýshiden patsientke deiin jetýin qadaǵalaý júiesin engizý qajettigin atap ótken bolatyn.
