Búgin Májiliste Palata Spikeri Nurlan Nyǵmatýlin «Nur Otan» partiiasy fraktsiiasynyń keńeitilgen otyrysyn ótkizdi. Depýtattar halyq densaýlyǵy týraly kodekspen jumys isteý barysynda azamattyq qoǵamnyń pikirin eskerdi, dep habarlaidy "Ult aqparat" Májilistiń baspasóz qyzmetine silteme jasap.
Qazirgi ýaqytta Májilis «Halyq densaýlyǵy jáne densaýlyq saqtaý júiesi týraly» Kodeks jobasyn birinshi oqylymda qaraýǵa daiyndyq ústinde.
«Nur Otan» partiiasy fraktsiiasynyń depýtattary zań jobasynyń eń rezonanstyq normalaryn memlekettik organdardyń basshylarymen, belgili qoǵam qairatkerlerimen, meditsinalyq qoǵamdastyq pen azamattyq qoǵam ókilderiniń qatysýymen fraktsiianyń keńeitilgen otyrysynda talqylady.
Fraktsiianyń keńeitilgen otyrysyn ashqan Májilis Tóraǵasy Nurlan Nyǵmatýlin:
- Biz densaýlyq máselesin fraktsiia otyrysynda talqylaý týraly arnaiy sheshim qabyldaǵan bolatynbyz. Ózderińiz bilesizder bul másele búginde búkil halyqtyń nazarynda. Árine densaýlyq máselesi ol bizdiń memlekettiń basty bailyǵy. Sol úshin osy Densaýlyq Kodeksi ázirlendi. Qazir Májilistiń qaraýynda. Kóptegen usynystar, pikirler aitylyp jatyr. Bizdiń depýtattarymyz aimaqtarda bolǵan kezde de osy Kodeks boiynsha kóptegen talqylaý boldy. Búgin de ashyq, jariia túrde taǵy da jan jaqty talqylaityn bolamyz. Nátijesinde joǵary deńgeidegi sapaly zań qabyldaýymyz kerek, - dedi.
Nurlan Nyǵmatýlin Kodeks jobasy Májiliske kelip túsken sátten bastap, depýtattardyń qatysýymen túrli alańdarda qyzý talqylanǵanyn aitty.
Nátijesinde, kóptegen kúrdeli máseleler boiynsha ymyraǵa keldi. Atap aitqanda, bul transplantologiia máselesi.
Otyrysta A.N. Syzǵanov atyndaǵy ulttyq ǵylymi hirýrgiia ortalyǵynyń Basqarma tóraǵasy Bolatbek Baimahanov, «Ómir Syiy» Respýblikalyq qoǵamdyq qorynyń basshysy Sandýǵash Orynbaeva men «Aman-saýlyq» Qoǵamdyq qorynyń jetekshisi Baqyt Túmenova óz ustanymyn bildirdi.
Al shetelge aǵzalardy eksporttaý normasyna qatysty Májilis Tóraǵasy Nurlan Nyǵmatýlin Kodeks jobasynda bizdiń memleketimizden tys jerde júrgen Qazaqstan azamattaryna meditsinalyq kómek kórsetý qajet bolǵan jaǵdaida ǵana transplantatsiialaý úshin eksporttaý múmkindigi qarastyrylǵanyn atap ótti.
Sondai-aq, fraktsiia otyrysynda vaktsinatsiia normasyna erekshe nazar aýdaryldy.
Bul jaiynda juqpaly aýrýlar boiynsha mamandar, mektepke deiingi mekemelerdiń ókilderi jáne Qazaqstandaǵy bala quqyqtary jónindegi ýákil Arýjan Sain óz oilarymen bólisti.
Qoǵamdaǵy túrli pikirlerdi eskere otyryp, jumys toby halyqtyń qaýipsizdigin qamtamasyz etetin, profilaktikalyq egýler mindetti jáne erikti bolyp bólingenin usyndy. Qazaqstanda turaqty turatyn adamdar mindetti profilaktikalyq egýlerden ótýi kerek. Eger balanyń densaýlyǵynda meditsinalyq qarsy kórsetilimder bolmasa mindetti vaktsinatsiialardyń tizimine sáikes vaktsina jasalady.
Alaida, sapasyz vaktsinalardy jetkizý, vaktsinalardy saqtaý, tasymaldaý jáne paidalaný erejelerin saqtaýǵa qatysty jaýapkershilikti kúsheitý usynylady. Osyǵan sáikes, Taýarlar men qyzmetter qaýipsizdigi jáne sapasyn baqylaý komitetiniń quzyreti kúsheitilmek.
Sonymen qatar, naýqastyń ómirin jasandy qoldaý sharalaryn toqtatý týraly ortaq ustanym ázirlendi, ol týystarynyń kelisiminsiz bul shara toqtamaidy.
Fraktsiianyń keńeitilgen otyrysynda Densaýlyq saqtaý kodeksi jobasynyń árbir normasy jan-jaqty, tereń talqylandy.
Otyrysta Tutynýshylar quqyǵyn qorǵaýǵa arnalǵan ulttyq koalitsiia Tóraǵasy Murat Ábenov, saiasattanýshy Daniiar Áshimbaev sóz sóiledi.
