«Qazaqstan temir joly» memlekettik kompaniiasy men S.D.Asfendiiarov atyndaǵy Qazaq Ulttyq meditsina ýniversiteti jáne meditsinalyq saqtandyrý qorymen birige otyryp, meditsinalyq «Densaýlyq» poiyzyn attandyrdy. Segiz ai boiy mamandar Qazaqstan oblystarynyń temir jol beketterinde aýyl turǵyndaryn qabyldaityn bolady, dep habarlaidy "Ult aqparat" «Áleýmettik meditsinalyq saqtandyrý qory» baspasóz qyzmetine silteme jasap.
Qazaqstannyń shalǵai jatqan temir jol stantsiialaryna aialdaityn poiyzdyń sapary biylǵy jyldyń 21 jeltoqsanynda aiaqtalady. 240 kún ishinde shoiyn jol boiynda ornalasqan aýyldardyń turǵyndaryna shamamen 230 mln teńgeniń qyzmeti kórsetilmek.
Atap aitar jait, meditsinalyq poiyzdar negizinde kórsetiletin qyzmetter «Áleýmettik meditsinalyq saqtandyrý qory» kommertsiialyq emes aktsionerlik qoǵamy tarapynan qarjylandyrylady. Dástúrli jobany «Qazaqstan temirjoly» UK» AQ men «Samruk-Kazyna Trust» áleýmettik jobalardy damytý qory birlesip júzege asyrady. Sonymen qatar, «Densaýlyq» poiyzy Atyraý, Mańǵystaý, Qyzylorda, Túrkistan, Almaty, Batys Qazaqstan, Qaraǵandy, Soltústik Qazaqstan oblystary aýmaǵyndaǵy 195 stansaǵa aialdaidy. Sapar barysynda barlyǵy 40 myńǵa jýyq adamǵa meditsinalyq kómek kórsetý josparlanyp otyr.
«Densaýlyq» poiyzynda rentgen zerthanasy, fliýorografiia, EKG, qursaq qýysynyń ÝDZ, FGDS, ÝZDG qamtylǵan. Stomatolog-hirýrg, terapevt, nevropatolog, kardiolog, hirýrg, ginekolog, oftalmolog, pediatr, otolaringolog, rentgenolog, mammolog, somnolog, onkolog, zerthanalyq dáriger-laborant, qyzmettik diagnostika dárigeri aýyl turǵyndaryn tegin qaraidy.
"Toqtala ketetin jait, biyl densaýlyq salasy qyzmetkerlerimen birge Meditsinalyq saqtandyrý qory qyzmetkerleri de jolǵa shyqpaq. Ondaǵy maqsat - stansalar turǵyndaryna mindetti áleýmettik meditsinalyq saqtandyrý júiesi jaily jan-jaqty málimet berý. Sebebi, bul Qazaqstandaǵy árbir turǵynǵa qatysy bar, mańyzdy reforma. Sondyqtan da Qor azamattardyń saqtandyrýǵa qatysty suraqtaryna jaýap beretin núkteler sanyn arttyryp, konsýltatsiialardy jetildire túsýge den qoiyp otyr" delingen baspasóz baianynda.
Konsýltatsiialar barysynda shalǵai eldi mekenderdiń turǵyndary MÁMS júiesiniń artyqshylyqtary, kepildendirilgen tegin meditsinalyq kómek jáne mindetti áleýmettik mneditsinalyq saqandyrý paketteri sheńberinde kórsetiletin qyzmetter, saqtandyrý jarnasynyń mólsheri, Biryńǵai jiyntyq tólemdi tóleý tártibi, memleket tarapynan saqtandyrylatyn sanattar jaily tolyq málimet ala alady.
Poiyz 9 vagonnan turady. Onyń ishinde tórteýi - emdik-diagnostikalyq protsedýralar júrgizý úshin, al ekeýinde qyzmetkerler ornalassa, bireýinde dári-dármekter saqtalady. Sonymen qatar, meiramhana vagony men avtonomiialyq qýat únemdeý vagony da bar.
