Adamdarǵa vaktsinany tańdaý quqyǵy jáne tiisti aqparat berilýi tiis. Bul týraly Úkimet otyrysynda QR Premer-Ministri Asqar Mamin aitty, dep habarlaidy "Ult aqparat".
«Qazirgi kezde aýrý juqtyrý boiynsha jaǵdaidyń jaqsarǵany baiqalyp otyr. Degenmen 6 óńir «qyzyl» aimaqta. Bul - Nur-Sultan jáne Almaty qalalary, Batys Qazaqstan, Aqmola, Qaraǵandy, Atyraý oblystary. Virýstyń reprodýktivtilik indeksi 0,98 quraidy. Aýrýhanalardaǵy oryndar – 36, jansaqtaý bólimderi 28 paiyz toly», - dedi Úkimet basshysy.
Sonymen qatar ol qazirgi tańda, vaktsinanyń birinshi komponenti 1,9 millionnan astam adamǵa, ekinshi komponenti 800 myńǵa jýyq adamǵa egilgenin atap ótti.
«Sonymen qatar, qoimalar men meditsinalyq uiymdarda vaktsinanyń birinshi jáne ekinshi komponentteri jetkilikti kólemde bar. Vaktsinalardyń qory únemi tolyqtyrylyp otyrady. Vaktsinalaý – jospar boiynsha júrgizilýde. Óńirlerde vaktsinalaýdy arttyrý boiynsha jumysty jalǵastyrý qajet. Ákimder máseleni erekshe baqylaýda ustasyn», - dedi Premer-Ministr.
Asqar Mamin adamdarǵa vaktsinany tańdaý quqyǵy jáne tiisti aqparat berilýi tiistigin basa aitty. Ásirese, Densaýlyq saqtaý ministrligi vaktsinalaý arasyndaǵy intervaldy naqty anyqtap, halyqtyń qalaýyna nazar aýdarý kerektigine atap ótti.
«Sonymen qatar shekteý sharalarynyń saqtalýyn baqylaý jónindegi monitoringteý toptarynyń jumysyn jalǵastyrý qajet. «Ashyq» qosymshasyn paidalaný oń nátijesin berip otyr. Sonyń arqasynda qyzmetter kórsetý salasyndaǵy biznestiń jumys isteý múmkindigi jaqsardy, olarǵa kelýshi adamdardyń qaýipsizdigi artty. Qosymshany paidalaný salalaryn odan ári de keńeitý qajet», - dedi Úkimet basshysy.
