QR Densaýlyq saqtaý ministrligi Dúniejúzilik densaýlyq saqtaý uiymymen birlesip, eldegi COVID-19 juqtyrý jaǵdaiyn anyqtaý boiynsha statistikalyq zertteý júrgizý jobasyn bastady. Bul týraly ministr Aleksei Tsoi aityp berdi, dep habarlaidy QazAqparat.
Bul tapsyrmany Memleket basshysy Qasym-Jomart Toqaev 29 qańtarda Reformalar jónindegi Joǵary keńestiń úshinshi otyrysynda bergen edi.
«COVID-19 aýyrǵandardyń shynaiy ahýalyn anyqtaý boiynsha statistikalyq zertteý júrgizý úshin ministrlik DDSU sanitariialyq-epidemiologiialyq saraptama jáne monitoring ǵylymi-praktikalyq ortalyǵy filialynyń bazasynda tiisti jobany iske asyrýda. Ári qarai zertteý nátijeleri negizinde statistikalyq derekterdi tirkeý jumystary júredi», - dedi A.Tsoi Úkimet otyrysynda.
Sonymen birge, ministr Prezident tapsyrmasy aiasynda tanymal qazaqstandyq dárigerlerdiń usynystaryn jan-jaqty talqylaý úshin ministrlik ókilderi men sarapshylardyń qatysýymen kezdesý ótetinin aitty. Sodan keiin olardyń kandidatýralary Densaýlyq saqtaý salasyndaǵy ulttyq jobalardy anyqtaý jónindegi top quramyna engiziledi.
