Denis Tenniń sońǵy muzdy shoýy 9 maýsymda Astanadaǵy "Barys Arenada" ótken edi. "Denis jáne onyń dostary" atty óner keshi qazaqstandyq sportshynyń esep boiynsha tórtinshi shyǵarmashylyq shoýy boldy. Mánerlep syrǵanaý juldyzdary, jandy mýzyka, teatrlandyrylǵan qoiylym, innovatsiialyq tehnikalyq elementter - osynyń barlyǵy Denis Tenniń muzdy shoýynan kórinis tapqan.
Shara Astananyń 20 jyldyq mereitoiyna orailastyrylǵan edi. Álemdik deńgeidegi bul keshke Resei, Frantsiia, AQSh, Kanada, Qytai jáne Japoniia elderinen mánerlep syrǵanaý sportynyń juldyzdary keldi.
Eske sala ketsek, búgin Almatyda tanymal mánerlep syrǵanaýshy Denis Tendi pyshaqtap ketkeni habarlandy.
Qalalyq IID baspasóz qyzmetiniń habarlaýynsha, oqiǵa Qurmanǵazy Baiseiitova kósheleriniń qiylysynda beisenbi kúni túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
