Tanymal qazaqstandyq mánerlep syrǵanaýshy Denis Tenniń stsenariii boiynsha túsirilgen «Soqyr mahabbat» filmi 28 shildeden bastap prokatqa shyǵady. Filmniń bas prodiýseri Timýr Bekmambetov pen sportshynyń anasy Oksana Ten, dep habarlaidy QazAqparat.
Siýjet boiynsha, qyz ben jigit áleýmettik jelide tanysyp, bir-birine ǵashyq bolyp qalady. Keiin qyzdyń kereń-mylqaý, al jigittiń kózi kórmeitini anyqtalady. Filmde áleýmettik jeli kez kelgen tosqaýyldy joiyp, shynaiy mahabbatqa jol beretini kórsetilgen.
Denis Ten stsenariidi 2018 jyly Timýr Bekmambetovtiń kinokompaniiasy atynan Screenlife Contest baiqaýyna qatysý úshin jazǵan. Ótinishin jasyryn joldap, finalister qatarynan kórindi.
«Men Deniske pitchingke qatysý ideiasy týraly aittym. Sosyn ol jasyryn túrde ótinish berdi. Baiqaýǵa álemniń túkpir-túkpirinen 250-den astam ótinim túsken. Nátijesinde Máskeýde ótken halyqaralyq baiqaýda Denis jeńimpaz atandy. Biz túsirilimdi Los-Andjelesten bastaýdy josparlap qoiǵan edik. Bul qaiǵyly oqiǵadan bir ai buryn bolǵan edi. Keiin Denistiń anasymen birge bul filmdi túsirý kerek dep sheshtik», - deidi Denistiń dosy, atqarýshy prodiýser Igor Tsai.
Túsirilim 2019 jyldyń basynda bastalyp, úsh aiǵa sozyldy. Rejisser Venetsiia kinofestivaliniń jeńimpazy Chak Che boldy. Halyqaralyq filmdi túsirýge qazaqstandyq mamandar da belsene atsalysty.
Igor Tsaidyń aitýynsha, film el nazaryna 28 shildeden bastap jol tartpaq. Sonymen qatar kúzde Ońtústik Koreiada prokatqa shyǵady.
Aita keteiik, kino týyndynyń stsenarisi Denis Ten osydan 4 jyl buryn 25 jasynda pyshaq jaraqatynan qaza bolǵan edi.
Eske salaiyq, mánerlep syrǵanaýshy Denis Ten 2014 jyly Sochide ótken Olimpiada oiyndarynyń qola júldegeri atanǵan bolatyn.
