Almatyda Denis Tenniń urylarmen jaǵa jyrtysyp jatqanyn kórgen politseiler jaýapqa tartylýy múmkin. Bul týraly búgingi aldyn ala sot tyńdalymy barysynda jábirlenýshi taraptyń qorǵaýshysy Nurlan Óstemirov aitty, dep habarlaidy QazAqparat tilshisi.
«Videosy bar. Kýágerler túsip qalǵan. Eki politsiia qyzmetkeri júr. Olar ne istep júr onda? Qazir olarǵa qatysty ulttyq biýro qylmystyq is qozǵap jatyr. Biraq olar ázirge shara qabyldamaǵany úshin jaýapqa tartylyp jatyr. Tapsyrys berýshiler bolýy yqtimal. Qiiasov Denistiń ólimin óz moinyna alyp otyr. Videoda kóringendei ol artqy jaǵynnan kelgen. Al artqy jaǵyndaǵy adam qalaisha adamnyń aldyna kelip, sanynyń ishki jaǵynan pyshaqtyń júzin joǵary qarata tiledi. Týra has sheber siiaqty. Tamyryn tilý úshin istelgen dep oilaimyz. Sondyqtan, iste basqa da kúdiktiler bolýy múmkin ekenin joqqa shyǵarmaimyz», - dedi qorǵaýshy Óstemirov.
Munyń aldynda sottalýshylardyń jeke basy týraly məlimet belgili boldy. Sottalýshy Janar Tolybaeva óziniń júktiliktiń 6,5 ailyǵynda ekenin məlimdegen bolatyn.
Kelesi sot otyrysy 3 qańtarǵa tańerteńgi 10-ǵa belgilendi.
Eske salsaq, Denis Tendi biyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denis Tenniń ólimine qatysty qylmystyq isqozǵalyp, kúdiktiler izdestirildi. Elbasy Denis Tenge qatysty qylmysty muqiiat tekserýdi tapsyrdy. Keiin QR IIM kúdiktilerdiń ustalǵanyn jariia etti.
Al, qyrkúiek aiynyń sońynda Ishki ister ministri Qalmuhanbet Qasymov atalmysh qylmystyq istiń tergelýine qatysty málimet bergen bolatyn.
Búgin Almaty qylmystyq ister boiynsha aýdanaralyq mamandandyrylǵan sotta belgili sportshynyń ólimi boiynsha aldyn ala sot tyńdalymy ótti.
