Almatyda Denis Tenniń ólimine kúdiktiler 23 qazanǵa deiin qamaýda otyratyn boldy, dep habarlaidy "Ult aqparat".
«Almaty qalasynyń mamandandyrylǵan tergeý soty 11-12 qyrkúiekte arnaiy qaýly shyǵardy. Kúdiktilerdi qamaýda ustaý merzimi 3 aiǵa deiin, iaǵni 23 qazanǵa deiin sozyldy», - dedi qalalyq sottyń baspasóz hatshysy Dias Mahambetov.
Eske salsaq, qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy men Baiseiitova kósheleriniń qiylysynda 19 shildede túski saǵat 15:00-der shamasynda bolǵan.
Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusynan jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy. Keiin belgili bolǵandai, sportshynyń ólimine qatysy bar kúdiktiler ustalyp, qylmystaryn moiyndady.
