Denis Tenniń ólimine qatysty úshinshi adam ustaldy, dep xabarlaidy "Ult aqparat"
Bas prokýrordyń orynbasary Marat Axmetjanovtyń aitýynsha, úshinshi adam tiisti aqparatty ýaqytynda jetkizbegeni úshin jaýapqa tartylyp otyr.
«Iá, Denis Tenniń ólimi boiynsha úsh adam ustaldy. Úshinshi adamnyń aty-jónin aitpai-aq qoiaiyn. Ol tiisti aqparatty ýaqytynda aitpaǵany úshin jaýapqa tartylyp otyr», - dedi M.Axmetjanov Astanada ótken baspasóz máslixatynda.
Eske sala ketsek, qazaqstandyq mánerlep syrǵanaýshy, Sochi Olimpiadasynyń qola júldegeri Denis Ten 19 shilde kúni Almatyda avtokólik urylarynyń qolynan qaza tapty. Sportshy turaqta turǵan kóliginiń ainasyn urlamaq bolǵan qaskóilerdiń ústinen túsken. Arada janjal shyǵyp, saldarynan kúdiktiler Denis Tenge pyshaq suǵyp alady.
Sportshy 3 litr qan joǵaltqan. Dárigerler 2,5 saǵat boiy onyń ómiri úshin kúreskenmen, ajaldan arashalap qala almady. Denis Ten 17:30-da aýrýhanada jan tapsyrdy.
Atalǵan faktige qatysty qylmystyq is qozǵaldy. QR prezidenti Nursultan Nazarbaev bas prokýror men ishki ister ministrine istiń jiti jáne obektivti tergelýin qamtamasyz etýdi tapsyrdy.
20 shilde kúni tańerteń mánerlep syrǵanaýshynyń ólimine kúdikti Nuraly Qiiasov ustaldy. Ol Jambyl oblysynyń týmasy, 24 jasta. Sol kúni keshke ekinshi kúdikti Qyzylorda oblysynyń týmasy Arman Qudaibergenov ustaldy.
