Denis Tenniń ólimine qatysty is sotqa jiberildi. Qylmystyq is Almaty qalalyq qylmystyq ister boiynsha mamandandyrylǵan aýdanaralyq sotynda qaralatyn boldy, dep habarlaidy QazAqparat tilshisi qalalyq sottyń baspasóz qyzmetine silteme jasap.
«Mamandandyrylǵan qylmystyq sotqa QR QK 434-baby, QR QK 24-babynyń 3-bólimi, 188-babynyń 2-bóliminiń 1- tarmaǵy boiynsha aiyptalǵan J.Tolybaeva, al QR QK 188-babynyń 2-bóliminiń 1 tarmaǵy, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan A. Qudaibergenov, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Nuraly Qiiasovqa qatysty is 13 jeltoqsanda tústi. Qylmystyq is 38 tomnan turady. Is boiynsha 3 sottalýshy sot aldynda jaýap beredi», - dedi baspasóz qyzmetinen.
Eske salsaq, qazaqstandyq mánerlep syrǵanaýshy Denis Ten 19 shilde kúni pyshaq jaraqatynan kóz jumǵan edi. Oqiǵa Qurmanǵazy men Baiseiitova kósheleriniń qiylysynda 19 shildede túski saǵat 15:00-der shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusynan jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi.
Biraq Almaty qalalyq densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy. Keiin belgili bolǵandai, sportshynyń ólimine qatysy bar kúdiktiler ustalyp, qylmystaryn moiyndady.
