Qazaqstandyq mánerlep syrǵanaýshy Denis Ten óltirilgen jerge birinshi bolyp jetken kýáger politseiler Almaty qalasynyń qylmystyq ister boiynsha mamandandyrylǵan aýdanaralyq sotyndaǵy protseske qatysty, dep habarlady Sputnik Qazaqstan tilshisi.
Qalanyń jol-patýldik qyzmetiniń vzvod komandiri Erdos Erkinbek 2018 jyldyń 19 shildesinde rota boiynsha jaýapty qyzmetin atqarǵan.
"Shevchenko – Baiseiitova kósheleri qiylysynda tóbeles bolyp, bireýdi pyshaqtap ketkeni týraly habar tústi. Oqiǵa ornyna alty minýtta jettim. Abylaihan kóshesine shyqqan kezde, baǵyttama jibere bastaǵanmyn. Oqiǵa ornyna kelgende qansyrap jatqan adamdy kórdim. Jaraqatynan joǵaryraq buraý saldym. Ol kezde Denis Ten ekenin bilmegen edim. Etpetinen jatqan bolatyn. Sosyn jedel járdem kelip jetti. Ainalar Tenniń qasynda jatqan edi. Sonymen birge eki joldorba boldy", — dep málimdedi Erkinbek.
Erkinbektiń aitýynsha, oqiǵa oryna kelip jetkende kámelettik jasqa tolmaǵandar isi boiynsha inspektor sol jerde bolǵan.
"Kúdiktilerdiń qandai kiim kigenin inspektordan surap, politseilerge ratsiiamen habarladym", — deidi tártip saqshysy.
Almaly aýdany jol-patrýldik qyzmetiniń ókili Adalbai Serjannyń aitýynsha, oqiǵany kórgen kýáger "jastar oinap júrgen shyǵar" dep oilapty.
"Ol bastapqydan jigitter oinap júrgen shyǵar dep qalypty. Bireýi qulaǵan sátte ǵana, mán-jaidy túsingen. Kýáger basqa da adamdardyń kórgenin aitty, biraq biz olardy tappadyq, sondyqtan bir kýágerdiń ǵana jaýabyn aldyq", — dedi Serjan.
Denis Tenniń ólimi týraly is
Sottalýshylar — Arman Qudaibergenov, Nuraly Qiiasov jáne Janar Tolybaeva. Bastapqy eki kúdiktige "Aldyn-ala sóz bailasý arqyly adamdar tobynyń qaraqshylyq jasaýy" jáne "Aldyn-ala sóz bailasý arqyly adamdar tobynyń kisi óltirýi" degen baptar boiynsha aiyp taǵyldy. Al Tolybaeva qylmys týraly habarlamady degen kúdikke ilindi.
25 jeltoqsanda ótken alǵashqy otyrysta jábirlenýshi taraptyń advokaty Nurlan Óstemirov Denis Ten tapsyryspen óltirildi dep málimdep, sottan isti qosymsha tergeýge jiberýdi suraǵan bolatyn. Biraq sýdia isti qaita tergeýge jiberýdiń qajeti joq dep sheshti.
Qudaibergenov pen Qiiasov urlyq jasaǵandaryn moiyndady. Alaida Denis Tendi óltirýdi josparlaǵan joqpyz deidi. Tolybaeva sottan ózi aiyptalyp otyrǵan baptardy ózgertýdi surady.
Qazir sot memlekettik tilde sýdia Keńshilik Ábeldinovtiń tóraǵalyǵymen ótip jatyr. Qylmystyq is 38 tomnan turady.
