Denis Tenniń ólimine ekinshi kúdikti Arman Qudaibergenovke qatysty jańa málimetter belgili boldy. Bul týraly "Ult aqparat" Qyzylorda oblystyq sotynyń baspasóz qyzmetine silteme jasap habarlaidy.
Kúdikti Arman Qudaibergenov Qyzylorda oblysy Baiqońyr qalasynyń turǵyny burynda da sotty bolǵandyǵy anyqtaldy.
«Bul azamat 2013 jyly sottalǵan. Ol kezde kúdiktiniń jasy 17-de bolǵan. Tergeý barysynda Arman 2012 jyldyń 9 jeltoqsanynda qaraqshylyq áreketke barǵandyǵy dáleldengen. Iaǵni, ol túnde kóshede ketip bara jatqan azamatty soqqyǵa jyǵyp, uialy telefonyn tartyp alǵan. Sot úkimi boiynsha ol bir jylǵa bas bostandyǵynan shektelgen bolatyn, - dep málimdedi Qyzylorda oblystyq sotynyń baspasóz qyzmeti.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
Búgin belgili bolǵandai, sportshynyń ólimine qatysy bar eki kúdiktiniń biri ustalyp, ol qylmysyn moiyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
Sondai-aq, Denis Tenniń ólimine kúdikti Nuraly Qiiasov kúzetpen Almaly aýdandyq sotyna jetkizilgen.
Al aldyn ala taratylǵan aqparat boiynsha Denis Tenniń ólimi boiynsha kúdikti ekinshi adam Arman Qudaibergenov ustaldy.
