Almatyda Denis Tenniń ólimine qatysty is boiynsha basty sot talqylaýy jalǵasýda, dep habarlaidy QazAqparat tilshisi.
Búgingi otyrysta prokýror Qýandyq Dosov sottalýshylarǵa qatysty aiyptaý aktisin oqydy.
«2018 jyly maýsymda bótenniń múlkin jymqyrý maqsatymen sottalýshy Qudaibergenov Shagabýtdinov Shevchenko kósheleriniń qiylysynda turǵan Jańqabaevtyń Lexus kóliginiń ainasyn alyp ketken. Osylaisha oǵan 608 myń teńge kóleminde shyǵyn keltirdi. Óziniń qylmysyn jasyrý maqsatynda ol ainalardy Shańyraqtaǵy saiǵa laqtyryp ketken. Sonymen qatar, Qudaibergenov 11-shildede zańsyz jolmen aqsha tabý maqsatynda Astanadaǵy kúishi Dina kóshesinde Shəmshievtiń kóliginiń ainasyn sheship ketken. Osyǵan bailanysty Qudaibergenovke QR QK 188-baby boiynsha aiyp taǵyldy. Keiin Qiiasov pen Tolybaeva, Qudaibergenov úsheýi «Magným» saýda úiinen as úi pyshaǵyn, qolǵap satyp alǵan.
19-shilde kúni Qurmanǵazy kóshesinen shyǵysqa qarai Baiseiitova kóshesinde LEXUS 708 02 nómirli kóliginiń turǵanyn baiqaǵan. Olar kólikterin «Dostyq» qonaq úiiniń qasyna qaldyryp, Tenniń avtokóligine qarai jaiaý jaqyndaǵan. Tolybaeva jan-jaǵyna qarap, adamdardyń qarasy azaiýyn, yńǵaily sətti kútip, 7 metr ara qashyqtan aimaqty baqylap turǵan. Qudaibergenov bolsa kóliktiń ainasyn shyǵaryp alyp, kólik iesine 199 myń teńge shyǵyn keltirgen. Sol sətte Denis Ten Tolybaevanyń qasynan ótip, kóliginiń janynda turǵan bóten adamdy kóredi. Onyń kólik ainasyn urlyq jasap jatqanyn baiqaǵan soń ainasyna jarmasa ketken. Qudaibergenov sol sətte Baiseiitova kóshesine qarai qasha jónelgen. Ten kóp uzamai ony qýyp jetken. Sol kezde Qudaibergenov pen Ten arasynda tóbeles bastalǵan. Qudaibergenov shalbarynyń belbeýin alyp Tenniń betinen ura bastaǵan. Sol sətte Qiiasov riýkzaktan pyshaqty alyp art jaǵynan kelgen. Qiiasov ózderiniń qylmysyn jasyrý maqsatynda adam óltirý qylmystyq oi piǵyly paida bolǵan. Qudaibergenov Tendi ustai turady. Sol kezde Qiiasov Denis Tenniń oń jaq sanynyń arteriiasynyń joǵarǵy tusynan eki ret pyshaq saldy. Ten alǵan jaraqatynan sol jerde qaitys boldy»,- dedi memlekettik aiyptaýshy Qýandyq Dosov.
Prokýror Arman Qudaibergenovke QR QK 192-babynyń 2-bólimi, QR QK 188-baby, QR QK 99-babynyń 2-bólimi boiynsha aiyp taǵylǵanyn aitty. Al Qiiasovqa QR QK 192-babynyń 2-bólimi, QR QK 2-bólimi, 7-8 tarmaǵy boiynsha aiyp taǵyldy.
Memlekettik aiyptaýshy Janar Tolybaevaǵa QR QK 188-baby men QR QK 434-baby negizinde aiyp taǵylǵanyn jetkizdi.
Al sottalýshylar Arman Qudaibergenov pen Nuraly Qiiasov ózderine taǵylǵan adam óltirý aiybymen kelispeitinderin aitty.
«Men urlyq jasaǵanymdy moiyndaimyn. Qaraqshylyq pen adam óltirý qylmysyn jasaý oiymda bolǵan joq. Jańqabaev pen Shəmshievtiń, Tenniń ainasyn alǵanymdy moiyndaimyn», - dedi Qudaibergenov.
Qiiasov ta óz qylmysyn moiyndaǵan joq.
Sottalýshy Janar Tolybaeva QR QK 188-babyn 30-bapqa aýystyrýdy ótindi. Onyń aitýynsha, ol qylmysqa bara jatqanyn bilmegen.
«434-bapty da moiyndamaimyn. Sebebi, men pyshaq salyp jatqanyn kórgen joqpyn»,- dedi Janar Tolybaeva.
Munyń aldyndaǵy otyrysta qos tarap aldyn ala tyńdalym barysynda óz talap aryzdaryn aitqan bolatyn.
Oksana Tenniń quqyǵyn qorǵaýshy Nurlan Óstemirov Denisti bireýler tapsyryspen óltirýi múmkin degen oimen isti qaita tergeýge jiberýdi suraǵan edi.
Sýdia sot zalynan tys keńesý bólmesinde keńesýden soń isti prokýratýraǵa qaita tergeýge jiberý qajettiligi joq dep sheshti.
Sonymen qatar, jábirlenýshi tarap Denistiń urylarmen jaǵa jyrtysyp jatqanyn eki politsei kórgenin aitty.
Sottalýshy Janar Tolybaeva óziniń júktiliktiń 6,5 ailyǵynda ekenin məlimdegen bolatyn.
Eske salsaq, Denis Tendi biyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denis Tenniń ólimine qatysty qylmystyq is qozǵalyp, kúdiktiler izdestirildi. Elbasy Denis Tenge qatysty qylmysty muqiiat tekserýdi tapsyrdy.
Keiin QR IIM kúdiktilerdiń ustalǵanyn jariia etti. Al, qyrkúiek aiynyń sońynda Ishki ister ministri Qalmuhanbet Qasymov atalmysh qylmystyq istiń tergelýine qatysty málimet bergen bolatyn.
25-jeltoqsanda Almatynyń qylmystyq ister boiynsha aýdanaralyq mamandandyrylǵan sotynda belgili sportshynyń ólimi boiynsha aldyn ala sot tyńdalymy ótti.
